ولجاس بەكتەنوۆ ب ا ق قىزمەتكەرلەرىن كاسىبي مەرەكەمەن قۇتتىقتادى
استانا. KAZINFORM - قازاقستان پرەمەر-ءمينيسترى ولجاس بەكتەنوۆتىڭ بۇقارالىق اقپارات قۇرالدارى قىزمەتكەرلەرى كۇنىمەن قۇتتىقتادى.
«قۇرمەتتى باق قىزمەتكەرلەرى!
سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن!
بۇقارالىق اقپارات قۇرالدارى ەلىمىزدەگى يگىلىكتى ىستەردىڭ جارشىسى، ادىلەتتى قوعامنىڭ ايناسى رەتىندە شىنايى ءومىرىمىزدىڭ اجىراماس بولىگىنە اينالدى.
جۋرناليستيكا - وراسان زور جاۋاپكەرشىلىكتى، ەرەن ەڭبەكتى جانە وتانشىلدىق رۋح سياقتى ۇلى قاسيەتتى قاجەت ەتەتىن بىرەگەي كاسىپ. بۇل ورايدا قازاقستاندىق جۋرناليستەر قاۋىمى ەلدىگىمىزدى نىعايتۋ، ۇلتتىق مۇددەنى قورعاۋ جولىندا ءوز مىندەتتەرىن مۇلتىكسىز اتقارىپ كەلە جاتقانىن ەرەكشە ىقىلاسپەن اتاپ وتەمىن. مەملەكەتتىك دەڭگەيدەگى كەز كەلگەن ماسەلەدە قوعام سىزدەردىڭ تاراپتارىڭىزدان ازاماتتىق جاۋاپكەرشىلىك پەن كاسىبي بىلىكتىلىكتى ايقىن سەزىنىپ كەلەدى.
اقپارات داۋىرىندە يدەولوگيا مايدانىنىڭ العى شەبىندە جۇرگەن قۋاتتى دا باسەكەگە قابىلەتتى وتاندىق مەديانىڭ ورنى قاشاندا كوش ىلگەرى بولاتىنىنا سەنىمدىمىن.
بارشاڭىزدى ءتول مەرەكەلەرىڭىزبەن قۇتتىقتاي وتىرىپ، مىقتى دەنساۋلىق، وتباسىلارىڭىزعا اماندىق، ەڭبەكتەرىڭىزگە جاڭا شىعارماشىلىق شابىت تىلەيمىن!»، - دەپ جازىلعان قۇتتىقتاۋىندا.
