پوشتا جەتكىزۋ ءتارتىبى وزگەرەدى - ءماجىلىس

بۇل قۇجات پارلامەنت ءماجىلىسى دەپۋتاتتارىنىڭ باستاماسىمەن ازىرلەندى. ولاردىڭ قاتارىندا دەپۋتات ەكاتەرينا سمىشليايەۆا دا بار.

- پوشتا وپەراتورلارىنىڭ قىزمەتى ەل ءۇشىن ۇلكەن ستراتەگيالىق ماڭىزى بار. سوندىقتان بۇگىنگى تاڭدا پوشتا سالاسى ترانسفورماتسيادان ءوتىپ جاتىر. الايدا قازىرگى كەزدە قاعاز حاتتاردى، مەرزىمدى باسىلىمداردى جەتكىزۋ قىزمەتتەرى ازايىپ كەلەدى. وسى جاعدايدا پوشتا بايلانىسىنىڭ لوگيستيكالىق ينفراقۇرىلىمىن جوعالتپاۋ جانە دامۋدىڭ وڭتايلى جولدارىن تابۋ ماڭىزدى. سوندىقتان زاڭ جوباسى اياسىندا جەتكىزۋ ءتارتىبى وزگەرەدى. تسيفرلىق تەحنولوگيالاردىڭ ارقاسىندا ءتيىستى پين- كود نەمەسە QR-كود بولعان كەزدە ءۇشىنشى تۇلعالاردىڭ پوشتانى قابىلداپ الۋ مۇمكىندىگىن بەرەدى. سونىمەن قاتار بۇل تاۋاردى ماركەتپلەيستەردەن پوشتا بولىمشەسىنە جانە ۇيگە جەتكىزۋدى جەڭىلدەتەدى، - دەدى ءماجىلىس دەپۋتاتى ە. سمىشليايەۆا.

مۇنىمەن قوسا، زاڭ جوباسىندا جوبادا سالەمدەمەلەردى قابىلداۋ ءۇشىن پوشتاماتتاردى ورنالاستىرۋ جانە پايدالانۋ ءتارتىبى ەسكەرىلگەن. بۇل نورما ولاردى كوندومينيۋم نىساندارىندا ورنالاستىرۋ ءۇشىن قاجەت.

- بۇدان بولەك، قازىر تالاپ ەتىلمەگەن كەيبىر امبەباپ قىزمەتتەر الىنىپ تاستالادى. مىسالى، پوشتا كارتالارىن نەمەسە باندەرولدەردى جىبەرۋ.

سونداي-اق تالاپ ەتىلمەگەن كوررەسپوندەنتسيانى ساقتاۋ مەرزىمى قىسقارادى، - دەدى ول.

ونىڭ ايتۋىنشا، پوشتا ينفراقۇرىلىمى بويىنشا ەسكىرگەن نورمالار الىنىپ تاستالادى. ءبىرقاتار نورمالار پوشتا بايلانىسى نارىعىن دامىتۋعا جانە وسى سالاداعى رەتتەۋشىنىڭ وكىلەتتىكتەرىن ناقتىلاۋعا باعىتتالعان.

بۇگىن ءماجىلىستىڭ جالپى وتىرىسىندا دەپۋتات جۇلدىز سۇلەيمەنوۆا پوشتا سالاسىندا تسيفرلىق تەحنولوگيالاردىڭ قاۋىپسىزدىگىنە قاتىستى سۇراق قويدى.

- زاڭ جوباسىندا QR-كود نەمەسە SMS ارقىلى پوشتانى الۋ تەتىكتەرى قاراستىرىلىپ وتىر. جالپى، وسى جاڭا تەتىكتەردى ەنگىزگەننەن كەيىن، ازاماتتاردىڭ جەكە دەرەكتەرى تارالىپ كەتپەي مە؟ سونىمەن قاتار الاياقتار ءۇشىن بۇل جاڭا ءتاسىل بولماي ما؟ - دەپ سۇرادى ج. سۇلەيمەنوۆا.

ءوز كەزەگىندە ەكاتەرينا سمىشليايەۆا وسى تاۋەكەلدەر ماجىلىستەگى جۇمىس توبىنىڭ وتىرىسىندا تالقىلانعانىن ايتتى.

- ەنگىزىلىپ وتىرعان تەتىكتەر ايتارلىقتاي جان-جاقتى پىسىقتالعان. QR- كود جانە SMS-تى پايدالانۋ كەزىندە بۇل ءىس-قيمىلدار پايدالانۋشىنىڭ ارنايى قوسىمشاداعى تەك «جەكە كابينەتىندە» جۇزەگە اسىرىلادى. سوندىقتان بۇل سالادا قاتەر بولمايدى، - دەپ ءتۇسىندىردى ە. سمىشليايەۆا.

اۆتور
رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى