دۇنيەجۇزىلىك بوكس ۇيىمى (WBO) قانات يسلامنىڭ جەڭىسىنە قاتىستى پىكىر ءبىلدىردى
بۇل تۋرالى قازاقپارات Sports.kz-كە سىلتەمە جاساپ حابارلايدى.
يسلام تورەشىلەردىڭ ءبىراۋىزدان قابىلداعان شەشىمىنە سايكەس جەڭىمپاز اتانىپ، WBO International نۇسقاسى بويىنشا العاشقى ورتا سالماقتاعى چەمپيون بەلدىگىن ساقتاپ قالدى.
«يسلام - WBO رەيتينگىندە 8-نومىردە تۇر جانە ودان جوعارى كوتەرىلۋى مۇمكىن. بۇل قانات ءۇشىن ەڭ كەرەمەت بوكس كەشى بولماسا دا، ول جەڭىسكە جەتەتىندەي جەتكىلىكتى ارەكەت جاسادى»، - دەپ جازدى WBO.
ەسكە سالا كەتەيىك، قازاقستاندىق كاسىپقوي بوكسشى قانات يسلام ناميبيالىق ۋولتەر كاۋتوندوكۆامەن قولعاپ ءتۇيىستىرىپ، جەڭىسكە جەتكەن بولاتىن.
ايقاس الماتى قالاسىنداعى بالۋان شولاق اتىنداعى سپورت سارايىندا ءوتتى. جەكپە-جەك ون راۋندقا سوزىلدى. تورەشىلەر شەشىمىمەن قانات يسلام جەڭىپ، WBO بەلبەۋىنە قول جەتكىزدى. ول وسىلايشا 27- رەت قارسىلاسىنان باسىم ءتۇسىپ وتىر.
الماتى قالاسىنىڭ اكىمى باقىتجان ساعىنتايەۆ بوكسشى قانات يسلامدى جەڭىسىمەن قۇتتىقتادى.
ايتا كەتەيىك، قازاقستاندىق قانات يسلام 2012-جىلدىڭ 28- قىركۇيەگىنەن بەرى كاسىپقوي بوكستا سىنعا ءتۇسىپ ءجۇر. بۇگىنگى كۇنگە دەيىن 27 جەكپە-جەك وتكىزىپ، ونىڭ بارلىعىندا قارسىلاسىنان باسىم ءتۇستى. ونىڭ 21 ءىن نوكاۋتپەن اياقتاعان.
