دەنساۋلىق ساقتاۋ ۇلتتىق ورتالىعى سپۋتنيك V- مەن ۆاكسينالاۋ كەستەسىنىڭ وزگەرۋىن ءتۇسىندىردى
جاقىندا ق ر باس مەملەكەتتىك سانيتارلىق دارىگەرىنىڭ 2021 -جىلعى 30-ساۋىردەگى N17-قاۋلىسىنا سايكەس Sputnik V - مەن ۆاكسينالاۋ كەستەسىنە وزگەرىستەر ەنگىزىلدى.
بۇل جاعدايدا وسى ۆاكسينانىڭ ءبىرىنشى جانە ەكىنشى كومپونەنتتەرىن ەنگىزۋ ارالىعى 45 كۇن بولۋى كەرەك. ەگەر 45-كۇنى ەكىنشى كومپونەنتتى ۆاكسينالاۋ مۇمكىن بولماسا (دەمالىس، مەرەكە كۇندەرىنە سايكەس كەلۋ، باسقا ەلدى مەكەنگە كەتۋ جانە ت. ب. ) 90 كۇن ىشىندە ۆاكسينالاۋعا رۇقسات ەتىلەدى. ۆاكسيناتسيا كەستەسىنە قاتىستى بۇل ۇستانىم پروفەسسور، ر ع ا اكادەميگى، گامالەي اتىنداعى ەپيدەميولوگيا جانە ميكروبيولوگيا ۇلتتىق زەرتتەۋ ورتالىعىنىڭ ديرەكتورى ا. گينسبۋرگتىڭ 2021 -جىلعى 22-ساۋىردەگى رەسمي مالىمدەمەسىنە نەگىزدەلگەن.
«ۆاكسينولوگيا پرينسيپتەرى كوپ دوزالى العاشقى ۆاكسينالاۋ سەرياسىنداعى دوزالار اراسىنداعى التى اپتالىق ارالىقتى قولدايدى. سونىمەن قاتار، نەگىزگى جانە قوسىمشا دوزا اراسىنداعى ۇزاق الشاقتىق ۆ- جاسۋشاسىنىڭ جادىسىنىڭ جەتىلۋىنە مۇمكىندىك بەرەدى، ناتيجەسىندە جوعارى جانە تۇراقتى رەاكسيا پايدا بولادى. ءبىر رەتتىك دوزادان كەيىن باسقا كوپ دوزالى ۆاكسينالاردى پايدالانۋ تاجىريبەسى جاسوسپىرىمدەر مەن ەرەسەكتەردە قورعانىس التى ايعا نەمەسە ودان دا ۇزاققا سوزىلۋى مۇمكىن ەكەنىن كورسەتەدى (مىسالى، ا گەپاتيتى جانە ادامنىڭ پاپيللوما ۆيرۋسىنا قارسى ۆاكسينالارى). مۇنىمەن قوسا، كوروناۆيرۋس ينفەكسياسىنا قارسى ۆاكسينالار بويىنشا عىلىمي زەرتتەۋلەر جالعاسۋدا. تيىمدىلىك بويىنشا دالەلدى بازاسى الىنعان جاعدايدا، قوسىمشا ۇسىنىستار جاسالاتىن بولادى»، - دەلىنگەن قوعامدىق دەنساۋلىق ساقتاۋ ۇلتتىق ورتالىعى باسپا ءسوز قىزمەتى مالىمەتىندە.
سونىمەن، 2021 -جىلى 6-ناۋرىزدا The Lancet عىلىمي باسىلىمىندا AstraZeneca COVID-19 ۆاكسيناسىنىڭ ۇلى بريتانيا، برازيليا جانە وڭتۇستىك افريكا جۇرگىزىلگەن ءۇش قاراپايىم راندوميزاتسيالانعان باقىلانبالى زەرتتەۋلەردىڭ ناتيجەلەرى نەگىزىندە دوزالار اراسىنداعى ارالىقتى ارتتىرعان جاعدايدا تيىمدىلىگى تۋرالى اقپارات جاريالاندى. زەرتتەۋ ناتيجەلەرىنە سايكەس، ەگەر ەكىنشى ەكپە 12 اپتادان نەمەسە ودان كەيىن جاسالسا، ونىڭ تيىمدىلىگى 81,3 پايىزدى قۇرايدى. ال ەكى دوزانىڭ اراسىنداعى ارالىق تەك 14 كۇن بولسا، وندا تيىمدىلىك دەڭگەيى 66,7 پايىز شاماسىندا بايقالدى.
«الەمدە كوروناۆيرۋس ينفەكسياسىنا قارسى جاپپاي ۆاكسينالاۋ جۇرگىزگەننەن باستاپ، بۇل تاجىريبە كوپتەگەن ەلدەردە ىندەتكە قارسى باسقا ۆاكسينالارعا دا قولدانىلىپ وتىر. قازىرگى كەزدە الىنعان عىلىمي مالىمەتتەرىنە سۇيەنە وتىرىپ، ۇلى بريتانيا ۆاكسينالارعا ارنالعان ەكپە ەگۋ جوسپارىن وزگەرتتى. ەگەر بۇرىن ۆاكسينانىڭ ەكىنشى دوزاسىن بىرىنشىسىنەن 21 كۇن وتكەن سوڭ سالۋ جوسپارلانعان بولسا، قازىر ارالىق مەرزىمى ءۇش ايعا دەيىن سوزىلدى»، - دەپ اتالىپ وتكەن ورتالىق دەرەكتەرىندە.
2021 -جىلدىڭ 14-ساۋىرىنەن باستاپ فرانسيادا م ر ن ق ۆاكسيناسىنىڭ ەكپەلەرى اراسىنداعى (BioNTech / Pfizer جانە Moderna كومپانياسى) ينتەرۆال 4 اپتانىڭ ورنىنا 6 اپتاعا دەيىن ۇلعايتىلدى. رەسمي دەرەكتەرگە سايكەس يرلانديانىڭ دەنساۋلىق ساقتاۋ ءمينيسترى جاقىن كۇندەرى Covid-19 ۆاكسيناسىنىڭ ءبىرىنشى جانە ەكىنشى دوزالارى اراسىنداعى ارالىقتى ءتورت اپتادان 12 اپتاعا دەيىن ۇزارتۋدى جوسپارلاپ وتىر. كوروناۆيرۋس ينفەكسياسىنا قارسى ۆاكسينالاۋدى وسى جىلدىڭ 25 اقپانىندا باستاعان ۋكراينانىڭ دەنساۋلىق ساقتاۋ مينيسترلىگى دە ءتيىستى وزگەرىس ەنگىزدى.
وسى ورايدا ۇلتتىق تەحنيكالىق ساراپشىلار توپتارىنىڭ ۇسىنىستارى بويىنشا CoviShield ۆاكسيناسىنىڭ ەكى ەكپەسىنىڭ ارالىعىن 28 كۇننەن 90 كۇنگە دەيىن ارتتى. بۇل ءوز كەزەگىندە 4-12 اپتادان كەيىن ەكىنشى دوزانى ەنگىزۋدى كوزدەيتىن ءوندىرۋشىنىڭ نۇسقاۋلارىنا قايشى كەلمەيدى.
«سونىمەن، كوروناۆيرۋس ينفەكسياسىنا قارسى ۆاكسينالاردىڭ تيىمدىلىگىن زەردەلەۋ بويىنشا الىنعان عىلىمي زەرتتەۋ دەرەكتەرى مەن بۇكىل الەمنىڭ ىندەتكە قارسى ۆاكسينالاۋ تاجىريبەسى ەكى دوزالى ۆاكسينانىڭ العاشقى دوزاسى ك ۆ ي مەن اۋرۋحاناعا جاتقىزۋ وقيعالارىنىڭ تومەندەۋىنە وڭ اسەر ەتەتىندىگىن راستايدى» ، - دەلىنگەن ق ر د س م قوعامدىق دەنساۋلىق ساقتاۋ ۇلتتىق ورتالىعى مالىمەتىندە.
