UFC شاۆكات راحمونوۆ تۋرالى فيلم ءتۇسىردى
استانا. قازاقپارات - UFC- ءدىڭ YouTube ارناسىندا قازاقستاندىق شاۆكات راحمونوۆ (18-0) پەن يرلانديالىق يەن گەرري (15-0) اراسىندا وتەتىن جەكپە- جەككە ارنالعان فيلم جارىق كوردى. بۇل تۋرالى Sports.kz جازدى.
بەينەجازبادا ەكى سپورتشىنىڭ جاتتىعۋى مەن جەكپە-جەك الدىنداعى پىكىرى كورسەتىلگەن.
ەسكە سالا كەتەيىك، شاۆكات راحمونوۆ پەن يەن گەرري اراسىنداعى جەكپە- جەك 7 - جەلتوقساندا لاس- ۆەگاستاعى (ا ق ش، نيەۆادا شتاتى) UFC 310 تۋرنيرىندە وتەدى. باستاپقىدا راحمونوۆ UFC جارتىلاي ورتا سالماقتاعى چەمپيوندىق بەلبەۋى ءۇشىن امەريكالىق بەلال مۇحاممەدپەن (24-3) كەزدەسۋى كەرەك ەدى. الايدا مۇحاممەد دەنساۋلىعىنا بايلانىستى جەكپە-جەكتەن باس تارتتى. ەندى راحمونوۆ گەرريدى جەڭگەن جاعدايدا، مۇحاممەدپەن تيتۋلدىق كەزدەسۋ وتكىزە الادى.
جەڭىلمەگەن قازاقستاندىق فايتەر شاۆكات راحمونوۆتىڭ (18-0) Dar Pro Team كومانداسى Instagram داعى رەسمي اككاۋنتىندا سپورتشىنىڭ چەمپيوندىق جەكپە-جەگى تۋرالى مالىمدەمە جاساعان ەدى.
UFC 310 تۋرنيرىندەگى شاۆكات راحمونوۆتىڭ قارسىلاسى بەلگىلى بولعانىن جازعان بولاتىنبىز.
