تيتانيكتە سوڭعى كۇنگى ۇسىنىلعان اس ءمازىرى 103000 دوللارعا ساتىلدى
اتاقتى كەمەنىڭ تاعدىرى ءالى دە كوپشىلىكتى قىزىقتىرادى. جاقىندا «تيتانيكتىڭ» ءبىرىنشى دارەجەلى جولاۋشىلارىنا ۇسىنىلعان اس ءمازىرى ۇلى بريتانيادا اۋكسيوندا ساتىلدى.
BBC News سايتىندا نيۋ-يوركتەگى ءبىر مەيرامحانانىڭ باس اسپازشىسى مۇحيت لاينەرىنىڭ سوڭعى كۇنى ۇسىنىلعان مەريلەند تاۋىعىنان قۋىرىلعان تاعامىن جاڭاشا دايىنداعانى تۋرالى ماقالا جاريالاندى. Aikyn.kz قايعىلى تاعدىرى بار كەمەنىڭ نەگە ءالى دە قىزىعۋشىلىق تۋدىراتىنىن، كەمەدە بەرىلگەن تاعام تۇرلەرىن ءبىلۋ كوپشىلىككە نەگە ماڭىزدى ەكەنىن تۇسىندىرەدى.
بۇل جەردەگى R. M. S. Titanic - كورولدىك پوشتا كەمەسى «تيتانيك» دەپ اۋدارىلادى. فوتو BBC News سايتىنان الىندى.
سەنبى كۇنگى انگليادا وتكەن اۋكسيوندا تيتانيكتىڭ 1912 -جىلدىڭ 11-ءساۋىر كۇنى بەرىلگەن اس ءمازىرى 103000 دوللارعا ساتىلعان. ءۇش كۇننەن كەيىن 14-ساۋىردە كەمە ايسبەرگپەن سوعىلىپ مۇحيت تۇبىنە كەتەدى. كەمەدە 2200 دەن استام جولاۋشى بولعان.
ونداعى ءاربىر ادامنىڭ وزىندىك تاعدىرى بولعان: سول زاماندا ءومىر سۇرگەن ەڭ باي ادام دجون دجەيكوب استور دا، امەريكادان جاقسى ءومىر ىزدەپ شىققان قاراپايىم يمميگرانت وتباسىلار دا كەمە پالۋباسىندا بولعان.
سوندىقتان دا بۇگىنگە دەيىن تيتانيككە بايلانىستى زاتتاردىڭ، وقيعالاردىڭ بارلىعى ادامدار ءۇشىن قىزىقتى، تاعىلىمى مول. سۋعا باتقاننان كەيىن 111 جىل وتسە دە، مۇحيت لاينەرىنىڭ ادام قيالىن جاۋلاپ الۋىنىڭ سەبەبى - وسىندا. سول سەبەپتى دە سۋ ءسىڭىپ قالعان ءبىر بەت قاعاز قىمبات كولىكتىڭ باعاسىنا ساتىلدى.
سۋعا باتقان كەمەدەن امان قالعان بىرنەشە ءمازىر مۇحيت لاينەرىنىڭ جولاۋشىلارىنا ۇسىنعان تاعامداردا ايتارلىقتاي ايىرماشىلىقتار بولعانىن كورسەتەدى. ءۇشىنشى دارەجەلى جولاۋشىلارعا كۇرىش سورپاسى، بوتقا جانە پىسپەنان (نەگىزىنەن اسقازاندى تىنىشتاندىراتىن جەڭىل تاعامدار) بەرىلسە، ءبىرىنشى دارەجەلى جولاۋشىلار ءۇشىن اس ءمازىرى ەرەكشە تاعامدارعا تولى بولعان. مازىردە سيىر ەتى، كوكتەمگى قوي ەتى نەمەسە پورتۆەين سوۋسىمەن ۇيرەك، مەريلەند تاۋىق ەتى جانە باسقا تاعام تۇرلەرى بولعان.
مەريلەند تاۋىق ەتىنە دامدەلگەن ۇن جاعىلىپ، شويىن تابادا قۋىرىلادى. فوتو BBC News سايتىنان الىندى.
نيۋ-يوركتەگى HoneyBunny كافەسىنىڭ يەسى مەريلەند شتاتىنىڭ تۇرعىنى دجارەد حوۆارد سياقتى اسپازداردىڭ ارقاسىندا «تيتانيكتە» بەرىلگەن مەريلەند قۋىرىلعان تاۋىعىنىڭ رەتسەپتى قالپىنا كەلگەن سياقتى.
بۇل تاعام ءتىپتى «تيتانيكتىڭ» ءبىرىنشى دارەجەلى تاماقتانۋشىلارىنا ۇسىنىلعان. اسپازشى تيتانيك جولاۋشىلارىنا ۇسىنىلاتىن نۇسقادا كىلەگەي سوۋسى ەمەس، اق شاراپ قوسىلعان ۆەليۋتەگە ۇقساس نارسە (قوسپادان، ۇننان جانە مايدان جاسالعان سوۋس) بولعانىن ايتادى.
حوۆارد ءوزىنىڭ اسپازشى ءمازىرى ءۇشىن ەرەكشە تاعام رەتسەپتەرىن زەرتتەي باستادى. ول ونى مەريلەند شتاتىنداعى قۋىرىلعان تاۋىقتان تابادى.
45 جاستاعى اسپاز شاعىن كافەسىنىڭ اتىن ءوزىنىڭ 11 جاسار قىزىنىڭ لاقاپ اتىمەن HoneyBunny دەپ قويادى. ءسويتىپ، تيتانيكتىڭ اس مازىرىندە بولعان مەريلەندتەگى قۋىرىلعان تاۋىقتى جاستارعا دا، قاراپايىم ادامدارعا قولجەتىمدى باعادا ازىرلەپ ناسيحاتتايدى.
مەريلەند قۋىرىلعان تاۋىق ەتىن دايىنداۋ ءۇشىن تاۋىق ەتىنە دامدەلگەن ۇن جاعىپ، شويىن تابادا قۋىرۋ كەرەك. ءپىسىرۋ كەزىندە تابانى قاقپاقپەن جابىڭىز، سوندا قۇس ءىس جۇزىندە بۋمەن پىسىرىلەدى. ال تاباداعى مايدى كىلەگەيلى سوۋسپەن ارالاستىرىپ ەتتىڭ ۇستىنە قۇيادى نەمەسە سول كۇيىندە ۇسىنادى.
