پۋتين ترامپتىڭ كۋرسك وبلىسىنداعى ۋكراينالىق اسكەري قىزمەتكەرلەر تۋرالى ۇندەۋىنە پىكىر ءبىلدىردى
استانا. KAZINFORM - پۋتين كۋرسك وبلىسىنداعى ۋكراين اسكەري كۇشتەرىنە جاناشىرلىق تانىتۋ جونىندەگى ترامپتىڭ ۇندەۋىمەن تانىستى، دەپ حابارلايدى ت ا س س.
- ءبىز ا ق ش پرەزيدەنتى، مىرزا ترامپتىڭ بۇگىنگى ۋكراين ارمياسىنىڭ اسكەري قىزمەتكەرلەرىنىڭ ءومىرىن ساقتاپ قالۋ جونىندەگى ۇندەۋىمەن تانىستىق. ولاردىڭ كەيبىر بولىگى رەسەي اسكەرىنىڭ قورشاۋىندا، بۇل - ۋكراينا قارۋلى كۇشتەرىنىڭ كۋرسك وبلىسىنا باسىپ كىرۋ ايماعى، - دەدى ۆلاديمير پۋتين رەسەي فەدەراتسياسى قاۋىپسىزدىك كەڭەسىنىڭ مۇشەلەرىمەن وتكەن جيىندا.
ونىڭ ايتۋىنشا، ۋكراينا قارۋلى كۇشتەرى كۋرسك وبلىسىندا بەيبىت حالىققا قارسى قىلمىس جاساعان، ولاردى ر ف باس پروكۋراتۋراسى تەرروريزم رەتىندە باعالايدى.
رەسەي پرەزيدەنتىنىڭ كومەكشىسى يۋري ۋشاكوۆ جۋرناليستەرگە بەرگەن مالىمدەمەسىندە، ۆلاديمير پۋتين ۋكراين اسكەري قىزمەتكەرلەرىنە ءومىرى مەن لايىقتى قارىم-قاتىناسقا كەپىلدىك بەرەتىنىن، ءبىراق بۇل تەك كيەۆ ءوز ساربازدارىنا قارۋ تاستاپ، تۇتقىنعا بەرىلۋ تۋرالى بۇيرىق بەرگەن جاعدايدا عانا مۇمكىن بولاتىنىن ايتتى، دەپ حابارلايدى ت ا س س.
بۇعان دەيىن ترامپ پۋتيننىڭ اسكەري قيمىلداردى توقتاتۋ تۋرالى ايتقان سوزدەرىنە پىكىر بىلدىرگەنى حابارلانعان ەدى.
13-ناۋرىزدا ۆلاديمير پۋتين ترامپتىڭ ارنايى وكىلى ستيۆ ۋيتكوففتى قابىلدادى. بۇل تۋرالى رەسەي پرەزيدەنتىنىڭ باسپا ءسوز حاتشىسى دميتري پەسكوۆ مالىمدەدى.
سونىمەن قاتار، ا ق ش پرەزيدەنتىنىڭ ۋكراينا جانە رەسەي بويىنشا ارنايى وكىلى كيت كەللوگ ماسكەۋدىڭ تالابى بويىنشا سوعىس توقتاتۋ جونىندەگى كەلىسسوزدەردەن شەتتەتىلدى.
