پۋتين شەتەلدىك اكسيونەرلەردى كاسپي قۇبىر كونسورتسيۋمىن قالپىنا كەلتىرۋگە كومەكتەسۋگە شاقىردى
استانا. KAZINFORM - رەسەي پرەزيدەنتى ۆلاديمير پۋتين ۇكىمەتپەن كەزدەسۋ بارىسىندا كراسنودار ولكەسىندەگى كاسپي قۇبىر كونسورتسيۋمىنىڭ (ك ق ك) مۇناي ايداۋ ستانساسىنا ۇشقىشسىز باسقارىلاتىن ۇشاقپەن جاسالعان شابۋىلعا قاتىستى پىكىر ءبىلدىردى، دەپ حابارلايدى kremlin.ru.
- بۇل - رەسەيلىك ۇيىم ەمەس، بۇل حالىقارالىق ۇيىم... ال مۇناي، مەنىڭ تۇسىنۋىمشە، ءونىمدى ءبولۋ تۋرالى كەلىسىمدەرگە سايكەس، شىن مانىندە، وسى شەتەلدىك اكتسيونەرلەرگە تيەسىلى، وسى كقك قۇبىرى ارقىلى ايدالعان مۇناي. مەنىڭ تۇسىنۋىمشە، بۇل كومپانيالاردىڭ وكىلدەرى وسى شابۋىلدىڭ سالدارىنان كەلگەن شىعىندى باعالاۋعا قاتىسىپ، نىساندى قالپىنا كەلتىرۋدىڭ مەرزىمى مەن مۇمكىندىكتەرىن انىقتاۋى كەرەك، - دەدى پۋتين ۇكىمەت مۇشەلەرىمەن كەزدەسۋىندە.
ۆلاديمير پۋتين جوندەۋ جۇمىستارىن تەزدەتۋ ءۇشىن كومپانيانىڭ شەتەلدىك سەرىكتەستەرىنە جابدىقتاردى وزدەرى اكەلۋىن ۇسىندى.
- ەگەر ولار نىساننىڭ جۇمىسىن قالپىنا كەلتىرۋگە مۇددەلى بولسا، وندا بارلىق سانكتسيالارعا قاراماستان، قاجەتتى جابدىقتى جەتكىزۋدى ۇيىمداستىرسىن. ولار مۇنى وزدەرى جاساسىن. ءسىز سەرىكتەستەرمەن بايلانىس ورناتتىڭىز دەپ تۇسىنەمىن. رەسەي ۇكىمەتى تاراپىنان بىردەڭە كەرەك بولسا، كومەك كورسەتۋدى سۇرايمىن، - دەدى ول ر ف ۇكىمەتى باسشىسىنىڭ ورىنباسارى الەكساندر نوۆاكقا.
امەريكالىق Chevron مۇناي-گاز كومپانياسى ك ق ك مۇناي ايداۋ ستانتسياسىنا قاتىستى جاعدايدى بىلەدى جانە باقىلاۋدى جالعاستىرىپ جاتىر.
- ءبىزدىڭ باسىمدىعىمىز ءارقاشان پەرسونالدىڭ، اكتيۆتەردىڭ قاۋىپسىزدىگىن، سونداي-اق مۇنايدى سەنىمدى جانە ۇزدىكسىز تاسىمالداۋدى قامتاماسىز ەتۋ بولىپ قالا بەرەدى. ك ق ك - قازاقستاندىق مۇنايدى حالىقارالىق نارىققا شىعارۋدىڭ نەگىزگى ەكسپورتتىق باعىتى جانە كوپتەگەن ەلدەر وزدەرىنىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن وسى ماڭىزدى كولىك ارتەرياسىنا سۇيەنەدى، - دەپ حابارلادى كومپانيا ت ا س س اگەنتتىگىنە.
ەسكە سالا كەتسەك، 17-اقپاندا كاسپي قۇبىر كونسورسيۋمىنىڭ «كروپوتكينسكايا» مۇناي ايداۋ ستانساسىنا ۇشقىشسىز ۇشاتىن اپپاراتپەن شابۋىل جاسالدى.
ق ر ەنەرگەتيكا مينيترلىگى كاسپي قۇبىر كونسورتسيۋمى ارقىلى مۇناي ايداۋدا شەكتەۋ جوق ەكەنىن مالىمدەدى.
كەيىننەن رەسەي تەرگەۋ كوميتەتى كاسپي قۇبىر كونسورسيۋمىنىڭ ازاماتتىق نىساندارىنا جاسالعان شابۋىل فاكتىسى بويىنشا قىلمىستىق ءىس قوزعادى.
