تيكتوكتا بەتىن تۇمشالاپ الىپ كونتەنت تاراتىنداردىڭ ارەكەتى زاڭمەن رەتتەلۋى مۇمكىن
مادەنيەت جانە اقپارات ءمينيسترى ايدا بالايەۆا TikTok-تا بەتىن تۇمشالاپ الىپ كونتەنت تاراتىنداردىڭ ارەكەتى تۋرالى پىكىر ءبىلدىردى، دەپ حابارلايدى Kazinform.
ءماجىلىستىڭ جالپى وتىرىسىنان كەيىن ب ا ق وكىلدەرى مينيسترگە الەۋمەتتىك جەلى اككاۋنتتارىن شەكتەۋ بەلەڭ الىپ جاتقانىنا الاڭداۋشىلار كوپ ەكەنىن ايتىپ، سۇراق قويدى.
«ءبىزدىڭ مينيسترلىك قۇزىرەتتى ورگان رەتىندە الەۋمەتتىك جەلىلەرگە مونيتورينگ جۇرگىزەدى. كونتەنتتەرىندە زاڭ بۇزۋ فاكتىلەرى انىقتالسا، ونى قۇقىق قورعاۋ ورگاندارىنا جىبەرەمىز. قۇقىق قورعاۋ ورگاندارى ول كونتەنتتىڭ زاڭعا قانشالىقتى سايكەس ەكەنىن انىقتاپ، زاڭ بۇزعانى دالەلدەنسە، ءىس قوزعاۋعا قۇقىقتارى بار. جىل باسىنان بەرى ءار باعىتتاعى 800 دەن استام زاڭ بۇزۋ فاكتىسى تىركەلدى. ونىڭ ىشىندە پورنوگرافيالىق مازمۇنداعى، ەسىرتكى تاراتۋمەن بايلانىستى، ىرىتكى سالۋ، جالعان اقپارات سياقتى فاكتىلەر بار»، - دەدى مينيستر.
ايدا بالايەۆا الەۋمەتتىك جەلىدە بەتىن تۇمشالاپ الىپ كونتەنت تاراتاتىن قىز-كەلىنشەكتەردىڭ ماسەلەسى جەكە پىسىقتالاتىنىن ايتتى.
«تۇمشالانۋ ماسەلەسى ءالى زاڭمەن رەتتەلمەگەن. ويتكەنى ول ماسەلەنى ءبىز ەندى-ەندى قارايمىز. دەپۋتاتتار وسى ماسەلەنى بىزگە ساۋال رەتىندە جولدادى. ءبىز ونى جان-جاقتى زەردەلەپ جاتىرمىز. بۇل بىرىنشىدەن، ۇلتتىق قاۋىپسىزدىك ماسەلەسى ەكەنىن بۇعان دەيىن دە ايتتىم»، - دەدى مينيستر.
