تيكتوكقا 500 ميلليون ەۋرو ايىپپۇل سالىنۋى مۇمكىن
استانا. قازاقپارات - TikTok تىڭ باس كومپانياسى ByteDance ەۋروپا قولدانۋشىلارىنىڭ جەكە دەرەكتەرىن قىتايعا زاڭسىز جىبەرگەنى ءۇشىن 500 ميلليون ەۋرودان استام ايىپپۇلعا تارتىلۋى مۇمكىن.
بۇل تۋرالى Euronews Next حابارلادى.
يرلانديانىڭ دەرەكتەردى قورعاۋ كوميسسياسىنىڭ (DPC) اقپاراتىنا سۇيەنسەك، اتالعان ايىپپۇل ەۋرووداقتىڭ جالپى دەرەكتەردى قورعاۋ ەرەجەسىن (GDPR) بۇزۋ فاكتىلەرى انىقتالعان تەرگەۋدىڭ ناتيجەسىندە سالىنباق. تەرگەۋ بارىسىندا TikTok تىڭ ينجەنەرلەرى ەۋروپالىق قولدانۋشىلاردىڭ دەرەكتەرىن قىتايدا وڭدەگەنى بەلگىلى بولدى.
TikTok تىڭ ەۋروپاداعى نەگىزگى رەتتەۋشىسى سانالاتىن يرلانديانىڭ DPC بۇل ايىپپۇلدى ءساۋىر ايىنىڭ سوڭىنا دەيىن رەسمي تۇردە جاريالاۋى مۇمكىن. كومپانيا بۇل شەشىمگە يرلانديا سوتىندا شاعىمدانۋعا قۇقىلى.
Bloomberg اگەنتتىگىنىڭ مالىمەتىنشە، بۇل سوما يرلانديانىڭ دەرەكتەردى قورعاۋ ورگانى سالعان ەڭ ءىرى ايىپپۇلدارىنىڭ ءبىرى بولۋى مۇمكىن. بۇعان دەيىن Amazon كومپانياسىنا 2021 -جىلى 746 ميلليون ەۋرو، ال Meta كومپانياسىنا 2023 -جىلى 1,2 ميلليارد ەۋرو ايىپپۇل سالىنعان بولاتىن.
ايىپپۇل TikTok تىڭ ا ق ش- تاعى قىزمەتىن 2025 -جىلعى 5 - ساۋىرگە دەيىن ساتۋ نەمەسە ەل اۋماعىنان كەتۋ مىندەتىنە قاتىستى تالقىلاۋلارمەن قاتار كەلىپ وتىر. ەگەر ساتۋ كەلىسىمى جۇزەگە اسپاسا، كومپانياعا ا ق ش اۋماعىندا تىيىم سالىنۋى مۇمكىن.
Euronews Next تۇسىنىكتەمە الۋ ءۇشىن TikTok كومپانياسى مەن يرلانديانىڭ DPC ىنە جۇگىنگەن. الايدا يرلانديا تاراپىنان بۇل ماسەلە بويىنشا ازىرگە پىكىر بەرىلمەدى.
بۇعان دەيىن ا ق ش پرەزيدەنتى دونالد ترامپ 26- ناۋرىز كۇنى ByteDance كومپانياسىمەن TikTok تى ساتۋ تۋرالى كەلىسىمگە كەلۋ ءۇشىن قىتايعا قارسى ەنگىزىلگەن قوسىمشا باج سالىعىن تومەندەتۋگە دايىن ەكەنىن مالىمدەدى.
