تورەعالي تورەالى 40 ساعات قوعامدىق جۇمىسقا تارتىلدى
الماتىدا تانىمال ءانشى تورەعالي تورەالىگە قاتىستى سوت ۇكىمى شىقتى، - دەپ حابارلايدى Massaget.kz ءتىلشىسى.
تانىمال ارتىسكە قىلمىستىق كودەكستىڭ 378-بابى بويىنشا «بيلىك وكىلىن ءوز قىزمەتتىك مىندەتتەرىن اتقارۋ كەزىندە نەمەسە ولاردى اتقارۋىنا بايلانىستى قورلادى» دەگەن ايىپ تاعىلدى.
ال تورەعاليدى ۇستاماق بولعان 6 پوليتسيا قىزمەتكەرى جابىرلەنۋشى دەپ تانىلدى.
«سوتتالۋشى ءاليحانوۆ (تورەعالي تورەالى - ەسك.) قىلمىستىق كودەكستىڭ 378-بابىنىڭ 1-بولىگى بويىنشا كىنالى دەپ تانىلسىن، وعان 40 ساعات قوعامدىق جۇمىستارعا تارتۋ جازاسى تاعايىندالسىن. سونداي-اق، ودان جابىرلەنۋشىلەر پايداسىنا 17 مىڭ تەڭگە جانە سوت شىعىندارىنا 19 مىڭ تەڭگە ءوندىرىلسىن»، - دەدى سۋديا.
سوت بارىسىندا ءانشى قاماۋعا الىنبادى: وعان باسقا بۇلتارتپاۋ شاراسى تاڭدالدى. وسىعان بايلانىستى سوتتالۋشى تورەعالي ءار سوت وتىرىسىنا تەرگەۋ يزولياتورىنان ەمەس، ۇيىنەن كەلەدى. بۇل جولى ول ءوزىنىڭ Lexus LX570 كولىگىمەن كەلدى، ول بيىل جازدا پوليتسيادان قاشىپ كەتپەك بولعان.
سوت وتىرىستارىندا سۋديا قىلمىستىق ءىس ماتەريالدارىن زەرتتەدى. وسىلايشا، پوليتسيا جۋرنالدارىنداعى جازبالار زەرتتەلدى، وندا وفيتسەرلەر وزدەرىنىڭ بەينەجازبالارىنىڭ نومىرلەرىن كورسەتەدى.
