توقايەۆ تۇركى ەلدەرىندە الەمنىڭ ۇزدىك ۋنيۆەرسيتەتتەرىنىڭ فيليالىن اشۋدى ۇسىندى
قازاقستان ەكونوميكالىق ىنتىماقتاستىق ۇيىمىنا تۇركى مەملەكەتتەرى ۇيىمىنىڭ بايقاۋشىسى مارتەبەسىن بەرۋ باستاماسىن قولدايدى.
بۇل تۋرالى اقوردادا ءوتىپ جاتقان تۇركى مەملەكەتتەرى ۇيىمىنىڭ 10- سامميتىندە مەملەكەت باسشىسى قاسىم-جومارت توقايەۆ ايتتى، دەپ حابارلايدى Kazinform.
«ءۇشىنشى باسىمدىق - رەفورمالار (Reforms). ۇيىم قىزمەتىن وڭتايلاندىرۋ شارالارىن جالعاستىرۋ كەرەك. وسىعان وراي تۇركى مەملەكەتتەرى ۇيىمى جانىنداعى تۇراقتى وكىلدەرىمىزدى تاعايىنداۋ ماسەلەسىن تەزىرەك شەشۋگە شاقىرامىن. سونداي-اق حاتشىلىق قىزمەتكەرلەرىنىڭ سانىن كوبەيتۋ تۋرالى ۇسىنىستى قولدايمىز»، - دەدى مەملەكەت باسشىسى.
پرەزيدەنت تۇركى مەملەكەتتەرىنىڭ سايلاۋ سالاسىنداعى ىنتىماقتاستىعىن نىعايتۋ قاجەتتىگىن باسا ايتتى.
«ورتالىق سايلاۋ ورگاندارىنىڭ كونسۋلتاتيۆتىك كەڭەسىن قۇرۋعا بولادى. سوڭعى كەزدە ءبىزدىڭ ۇيىمعا حالىقارالىق جانە ايماقتىق قۇرىلىمداردىڭ قىزىعۋشىلىعى ارتا ءتۇستى. ءبىز ەكونوميكالىق ىنتىماقتاستىق ۇيىمىنا بايقاۋشى مارتەبەسىن بەرۋ تۋرالى باستامانى قولدايمىز. سونىمەن قاتار ازىق-تۇلىك قاۋىپسىزدىگى جونىندەگى يسلام ۇيىمىمەن ىنتىماقتاستىق ورناتۋدى ۇسىنامىز»، - دەدى قاسىم-جومارت توقايەۆ.
ول سونداي-اق تۇركى ەلدەرىندە الەمدەگى ۇزدىك ۋنيۆەرسيتەتتەردىڭ فيليالىن اشۋدى ۇسىندى.
«ءتورتىنشى، عىلىمي ارىپتەستىك (Knowledge) ارقىلى ءبىلىم جانە عىلىم سالاسىنداعى ىنتىماقتاستىقتى نىعايتۋ اسا ماڭىزدى. وسى ورايدا ەلدەرىمىزدە الەمدەگى ۇزدىك ۋنيۆەرسيتەتتەردىڭ فيليالىن اشۋدى ۇسىنامىن. بىرلەسكەن عىلىمي شارالار وتكىزىپ، تاجىريبە الماسۋ كەرەك. ءتىل ۇيرەتەتىن بولىمدەردى اشۋعا قاتىستى جۇمىستى رەتتەۋ قاجەت. جاساندى ينتەللەكتىنى، سيفرلىق جانە اەروعارىش ونەركاسىبىن دامىتۋعا ەرەكشە نازار اۋدارعان ءجون»، - دەدى مەملەكەت باسشىسى.
