توقايەۆ رەسەيلىك بيزنەستى بىرلەسىپ حالال ازىق- تۇلىك شىعارۋعا شاقىردى

بۇل تۋرالى قازاقستان مەن رەسەيدىڭ XIX ءوڭىرارالىق ىنتىماقتاستىق فورۋمىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform.

«ءبىز 3 جىل ىشىندە اگروونەركاسىپ كەشەنىندەگى قايتا وڭدەلگەن ءونىمنىڭ ۇلەسىن 70 پايىزعا دەيىن ارتتىرۋ مىندەتىن قويىپ وتىرمىز. ونى ىسكە اسىرۋ ءۇشىن الەۋمەتتىك ماڭىزى بار ازىق- تۇلىك تاۋارلارى بويىنشا يمپورتقا تاۋەلدىلىكتى تومەندەتۋگە باعىتتالعان ءىرى ينۆەستيتسيالىق جوبالاردى ىسكە اسىرۋ باستالدى. الداعى جىلدارى 115 تاۋارلى- ءسۇت فەرماسى سالىنادى. بۇل ءسۇت ءوندىرۋ كولەمىن 600 مىڭ تونناعا ارتتىرۋعا مۇمكىندىك بەرەدى. ءبىز جىلىنا 120 مىڭ توننادان استام ەت وندىرەتىن 15 ءىرى قۇس فابريكاسىن سالامىز. الداعى 5 جىلدا قازاقستان اگروسەكتوردا 2,7 تريلليون تەڭگە سوماسىنا 900 گە جۋىق ينۆەستيتسيالىق جوبانى ىسكە اسىرۋدى جوسپارلاپ وتىر»، - دەدى قاسىم- جومارت توقايەۆ.

پرەزيدەنتتىڭ اتاپ وتۋىنشە، ەكولوگيالىق تازا ەكسپورتقا باعدارلانعان، حالىقارالىق، ونىڭ ىشىندە حالال ستاندارتتارىنا ساي كەلەتىن باسەكەگە قابىلەتتى ءونىم شىعارۋعا باسىمدىق بەرىلەدى.

«قازاقستان ازىق- تۇلىك قاۋىپسىزدىگى جونىندەگى يسلام ۇيىمىنىڭ نەگىزىن قالاۋشىلاردىڭ ءبىرى سانالادى. ونىڭ قۇرامىنا حالىق سانى 1,5 ميلليارد ادامنان اساتىن 37 مەملەكەت كىرەدى. ءبىزدىڭ ەلدەرىمىز بۇل نارىققا سەرتيفيكاتتالعان حالال ونىمدەرى ەكسپورتىن بىرلەسىپ ىلگەرىلەتە الار ەدىك. ءبىز رەسەيلىك بيزنەستى وسى باعىتتاعى تىعىز ىنتىماقتاستىققا شاقىرامىز»، - دەدى مەملەكەت باسشىسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى