توقايەۆ قاتىساتىن دوحا فورۋمى قانداي ماسەلەلەردى تالقىلايدى
استانا. KAZINFORM - قاتار استاناسى دوحا قالاسىندا 7، 8- جەلتوقسان كۇندەرى جاھاندىق سىن- قاتەرلەردى تالقىلاپ، ءتۇرلى سالاداعى يننوۆاتسيالىق شەشىمدەردى ىزدەۋگە ارنالعان حالىقارالىق فورۋم (Doha Forum) وتەدى.
Kazinform اگەنتتىگى اتالعان ءىس- شارانىڭ ماڭىزى تۋرالى شولۋ ۇسىنادى.
بۇل جولى فورۋم «ديپلوماتيا، ديالوگ، ءارالۋاندىق» تاقىرىبىن ۇران ەتىپ الىپ وتىر.
جالپى بۇل ءىس-شارا 2000 -جىلدان بەرى ۇيىمداستىرىلىپ كەلەدى. فورۋم شيرەك عاسىرعا جۋىق ۋاقىتتا الەم كوشباسشىلارى مەن ساراپشىلاردىڭ، ازاماتتىق قوعام وكىلدەرىنىڭ اراسىنداعى بەدەلدى ديالوگ الاڭىنا اينالدى.
«الەمدى شەكارالار بىرىكتىرىپ تۇرعانى سياقتى ورتاق پروبلەمالاردىڭ شەشىمىن دە ءوزارا بايلانىستان تابۋعا بولادى»، - دەپ جازىلعان ءىس-شارانىڭ رەسمي سايتىندا.
جىل سايىن بۇل فورۋمعا مەملەكەت باسشىلارى مەن ۇكىمەت جەتەكشىلەرى، سىرتقى ىستەر مينيسترلەرى مەن پارلامەنتتەردىڭ وكىلدەرى، عالىمدار مەن كاسىپورىن باسشىلارى، ۇكىمەتتىك ەمەس ۇيىمداردىڭ وكىلدەرىن جينالادى.
بيىلعى 22- فورۋم «the Innovation Imperative» تاقىرىبىمەن وتەدى. ياعني، وعان قاتىسۋشىلار جاھانداعى وزەكتى ماسەلەلەردى يننوۆاتسيالىق شەشىمدەردى ۇتىمدى پايدالانۋ ارقىلى شەشۋدىڭ جولدارىن تالقىلاماق.
- دوحا فورۋمىندا ءبىز تەحنولوگيالاردى باسقارۋدان باستاپ بەيبىتشىلىك ورناتۋ تاقىرىبىنا دەيىنگى جاھاندىق اۋقىمداعى ماسەلەلەردى ديالوگ الاڭىنا شىعارىپ، الەم كوشباسشىلارىنىڭ باسىن قوسامىز. بىرىكتىرەمىز، - دەيدى دوحا حالىقارالىق فورۋمىنىڭ باس مەنەدجەرى ماحا ءال-كۋۆاري.
فورۋمنىڭ كۇن تارتىبىنە ىرىكتەلگەن ماسەلەلەر توڭىرەگىندە 80-نەن استام پىكىرتالاس سەسسياسى ۇيىمداستىرىلادى.
مارتەبەلى مەيماندار
ۇيىمداستىرۋشىلاردىڭ مالىمەتى بويىنشا، بيىلعى ءىس-شاراعا 150-دەن استام ەلدەن 4500-دەن استام ادام شاقىرىلعان. ولار 300-دەن استام ساراپشىنىڭ پايىمىن تىڭداپ، وي قورىتۋعا مۇمكىندىك الماق. فورۋمدا ءسوز الاتىن 7 مەملەكەت باسشىسىنىڭ ىشىندە قازاقستان پرەزيدەنتى قاسىم-جومارت توقايەۆ تا بار.
فورۋمدا قاسىم-جومارت توقايەۆ ارنايى سەسسيا وتكىزىپ، زاماناۋي قاۋىپ-قاتەرلەرگە «ورتا» دەرجاۆالاردىڭ رولىنە لايىقتى نازار اۋدارۋ ارقىلى قارسى تۇرۋ جولدارى تۋرالى پايىمىن بولىسەدى. بۇل تۋرالى قازاقستاننىڭ قاتارداعى ەلشىسى ارمان يساعاليەۆ Gulf Times گازەتىنە بەرگەن سۇحباتىندا ايتقان.
- پرەزيدەنتتىڭ دوحا فورۋمىنا قاتىسۋى قازاقستاننىڭ يننوۆاتسيالاردى جەدەلدەتۋ جانە تەحنولوگيالىق پروگرەسكە جاردەمدەسۋ جونىندەگى ۇزاق مەرزىمدى ستراتەگيالىق جوسپارلارىنا نەگىزدەلگەن، - دەيدى ەلشى ول سۇحباتتا.
فورۋمنىڭ «يننوۆاتسيا يگىلىگى: جاھاندى تەحنولوگيالاردى باسقارا وتىرىپ دامىتۋ» اتتى پانەلدىك سەسسياسىندا قازاقستاننىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ءسوز سويلەيدى دەپ جوسپارلانعان. ال «ورتالىق ازيا جانە جاھاندىق ەنەرگەتيكالىق قاۋىپسىزدىكتىڭ جاڭا ءداۋىرى» اتتى سەسسيانى KAZENERGY قاۋىمداستىعىنىڭ ءتوراعاسى ماعزۇم مىرزاعاليەۆ اشادى.
فورۋم قارساڭىنداعى سارسەنبىدە «Doha Forum Youth edition 2024» جاستار فورۋمى ءوتىپ، وعان 90 ەلدەن 150 جاس ساراپشى قاتىستى.
بىلتىرعى فورۋمدا الەمنىڭ 120-دان استام ەلىنەن 3500 قوناق شاقىرىلعان بولاتىن.
