توقايەۆ پەن ەمبالو بيساۋ پورتى مەن ترانسكاسپي ءدالىزىن ۇشتاستىرۋ جولدارىن زەردەلەۋگە كەلىستى
استانا. KAZINFORM - قازاقستان مەن گۆينەيا- بيساۋ كولىك- لوگيستيكا سالاسىنىڭ الەۋەتىن تولىق پايدالانۋعا مۇددەلى. بۇل تۋرالى ەلىمىزگە رەسمي ساپارمەن كەلگەن گۆينەيا- بيساۋ پرەزيدەنتى ۋمارۋ سيسوكۋ ەمبالومەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
- ەڭ الدىمەن مەنىڭ شاقىرۋىمدى قابىل الىپ، قازاقستانعا رەسمي ساپارمەن كەلگەنى ءۇشىن پرەزيدەنت ۋمارۋ ەمبالو مىرزاعا شىنايى ريزاشىلىعىمدى بىلدىرەمىن. قادىرلى قوناقتارعا قوش كەلدىڭىزدەر دەگىم كەلەدى. بۇل ساپار قۇرلىقتار اراسىندا جول سالدى، الىس جاتقان ەلدەردى بايلانىستىردى. حالىقتارىمىزدىڭ تىلەگى مەن نيەتى ءبىر ەكەنىن كورسەتتى. بۇگىنگى كەزدەسۋلەر مازمۇندى ءارى ماعىنالى بولدى. ءبىز ءبىرقاتار ماڭىزدى ماسەلەگە قاتىستى كەلىسسوزدەر جۇرگىزدىك. ەكىجاقتى ىنتىماقتاستىقتى ودان ارى نىعايتۋدىڭ جولدارىن تالقىلادىق. بىلتىر استانا مەن بيساۋ اراسىندا ديپلوماتيالىق بايلانىس ورناعىنان 10 جىل تولدى. وسى كەزەڭدە دوستىق پەن ءوزارا تۇسىنىستىككە نەگىزدەلگەن قارىم- قاتىناسىمىز نىعايا ءتۇستى. ەكى باستىسى ءبىز قاشاندا ءبىر- بىرىمىزگە تىلەكشىمىز. گۆينەيا- بيساۋ قازاقستاننىڭ افريكا قۇرلىعىنداعى ماڭىزدى سەرىكتەسى، - دەپ اتاپ ءوتتى مەملەكەت باسشىسى.
قاسىم-جومارت توقايەۆ گۆينەيا- بيساۋ پرەزيدەنتىنىڭ ەكى ەل اراسىنداعى ىنتىماقتاستىقتى تەرەڭدەتۋگە زور ۇلەس قوسىپ كەلە جاتقانىن باسا ايتتى.
- مەن مۇنى جوعارى باعالايمىن. ەكىجاقتى كەزدەسۋدىڭ ناتيجەسىندە ءتيىمدى ۋاعدالاستىقتارعا قول جەتكىزدىك. بۇل ساپار ساياسي، ساۋدا- ەكونوميكالىق، مادەني-گۋمانيتارلىق جانە باسقا دا سالالارداعى ىنتىماقتاستىقتى ودان ارى نىعايتۋعا مۇمكىندىك بەرەدى. مىسالى، كولىك- لوگيستيكا سالاسىنىڭ الەۋەتىن تولىق پايدالانۋعا ەكى ەل دە مۇددەلى. وسى رەتتە باتىس افريكاداعى بيساۋ پورتى مەن ترانسكاسپي كولىك ءدالىزىن ۇشتاستىرۋ جولدارىن زەردەلەۋگە كەلىستىك. الەمدەگى گەوساياسي احۋال مەن ازىق- تۇلىك قاۋىپسىزدىگى ماسەلەسى ۋشىعىپ تۇرعان قازىرگى كەزدە مۇنىڭ ءمان- ماڭىزى ايرىقشا، - دەدى پرەزيدەنت.
بۇعان دەيىن حابارلاعانىمىزداي، پرەزيدەنت ۋمارۋ سيسوكۋ ەمبالو گۆينەيا- بيساۋ جاستارى قازاقستاننىڭ جوعارى تەحنيكالىق وقۋ ورىندارىندا ءبىلىم العىسى كەلەتىنىن ايتتى.
