توقايەۆ ماجارستان پرەمەر-مينيسترىنە: قازاقستان - ءسىزدىڭ اتامەكەنىڭىز
مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن ماجارستان پرەمەر- ءمينيسترى ۆيكتور وربانمەن كەڭەيتىلگەن قۇرامداعى كەزدەسۋ كەزىندە ەكى ەلدىڭ باۋىرلاستىق بايلانىسى تۋرالى ايتتى، دەپ حابارلايدى Kazinform اگەنتتىگى.
«قازاقستان ءسىزدىڭ اتامەكەنىڭىز دەپ ايتۋعا بولادى. سەبەبى تامىرىڭىز وسى جەردەن باستاۋ الادى. ءوزىڭىز قىپشاقتارعا وتە جاقىنسىز. بۇل دەرەكتى قازاقتار جاقسى بىلەدى. سوندىقتان سىزگە وتە ريزامىز. ءسىزدىڭ ساپارىڭىز وتە ماڭىزدى. ەكى ەل اراسىنداعى ىنتىماقتاستىققا كۇشتى سەرپىن بەرەدى دەپ سەنەمىز. قازاق پەن ماجار - ەجەلدەن سىيلاستىعى جاراسقان تۋىستاس حالىقتار. ەكى ەلدىڭ ءتىلى، سالت-ءداستۇرى، مادەنيەتى ۇقساس. ورتا عاسىرلاردا تورعاي دالاسىنان ەۋروپاعا قونىس اۋدارعان قىپشاق تايپالارىنىڭ ۇرپاقتارى بۇگىندە ماجارستان اۋماعىندا ءومىر ءسۇرىپ جاتىر. ءبىز مۇنى ماقتان تۇتامىز. تاريحي تامىرلاستىق جانە تىعىز بايلانىستار بۇگىندە ەكى ەل اراسىنداعى ىنتىماقتاستىقتىڭ تەرەڭدەي تۇسۋىنە نەگىز بولدى. بىرلەسكەن كۇش-جىگەرىمىزدىڭ ارقاسىندا قازاق-ماجار ىقپالداستىعى بارلىق سالادا قارقىندى دامىدى»، - دەدى مەملەكەت باسشىسى.
قاسىم-جومارت توقايەۆ قازاقستان وسى باۋىرلاستىقتى، ءوزارا ءتيىمدى قارىم-قاتىناستى بۇدان ءارى تەرەڭدەتۋگە مۇددەلى ەكەنىن اتاپ ءوتتى.
«بۇگىنگى كەلىسسوز ەكىجاقتى ستراتەگيالىق سەرىكتەستىكتى ودان ءارى دامىتۋعا تىڭ سەرپىن بەرەدى دەپ سەنەمىن»، - دەدى پرەزيدەنت.
بۇعان دەيىن اقوردادا ماجارستان پرەمەر-ءمينيسترىن قارسى الۋ سالتاناتى وتكەنىن جازعان ەدىك.
ەسكە سالساق، كەشە كەشكە ۆيكتور ورباندى استانا اۋەجايىندا ۆيتسە-پرەمەر سەرىك جۇمانعارين كۇتىپ العان بولاتىن.
قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا- ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلانادى دەپ جوسپارلانىپ وتىر.
ايتا كەتۋ كەرەك، استانادا تۇركى مەملەكەتتەرى ۇيىمىنىڭ X سامميتى وتەدى.
وعان ازەربايجان، قىرعىزستان، تۇركيا، وزبەكستان پرەزيدەنتتەرى، باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.
