توقايەۆ «بولاشاقتىڭ ويىندارى» حالىقارالىق تۋرنيرىنىڭ اشىلۋ راسىمىنە قاتىستى

پرەزيدەنت رەسمي مىنبەردەن «بولاشاقتىڭ ويىندارى» تۋرنيرىنىڭ سالتاناتتى اشىلۋ ءراسىمىن تاماشالادى.

رەسەيدىڭ مەملەكەتتىك ءانۇرانى ورىندالعاننان كەيىن ۆلاديمير پۋتين جارىستى اشىق دەپ جاريالادى.

قازاقستان پرەزيدەنتى تۋرنير قاتىسۋشىلارىنا ساتتىلىك تىلەدى.

- قۇرمەتتى ۆلاديمير ۆلاديميروۆيچ، ەڭ الدىمەن، سىزگە زور ريزاشىلىق بىلدىرگىم كەلەدى. بۇل - بىرەگەي ويىن. دۇنيەجۇزىندە مۇنداي ويىننىڭ بالاماسى جوق. بارشاڭىزعا ساتتىلىك تىلەيمىن. كەلەسى ويىندى قازاقستاندا وتكىزەيىك، - دەدى قاسىم-جومارت توقايەۆ.

سونىمەن قاتار بەلارۋس، قىرعىزستان، تاجىكستان جانە وزبەكستان پرەزيدەنتتەرى كيبەرسپورتشىلارعا ىزگى تىلەكتەرىن جولدادى.

سودان سوڭ جارىسقا قاتىسۋشى مەملەكەتتەر تۋلارىنىڭ شەرۋى ءوتتى.

«فيدجيتال-كونتسەپتسياعا» نەگىزدەلگەن تۋرنيردىڭ فورماتى فيزيكالىق بەلسەندىلىكتى، زاماناۋي تەحنولوگيا مەن سيفرلىق ورتانى ۇشتاستىرادى.

شوۋ بارىسىندا سپورت، ستراتەگيا، تاكتيكا، تەحنولوگيا، جىلدامدىق سەكىلدى 5 توپقا بىرىكتىرىلگەن سايىس تۇرلەرى تانىستىرىلدى.

ويىنداردىڭ باعدارلاماسىنا كلاسسيكالىق سپورت تۇرلەرى مەن ولاردىڭ 21 سيفرلىق بالامالارى بويىنشا گيبريدتى سپورتتىق جارىستار ەنگىزىلگەن.

ۇيىمداستىرۋشىلاردىڭ مالىمەتى بويىنشا تۋرنيرگە 100 دەن استام ەلدەن 2 مىڭعا جۋىق كيبەرسپورتشى كەلگەن.

قازاقستاننىڭ ويىنشىلارى مەن كوماندالارى سپورتتىڭ 13 ءتۇرى بويىنشا سايىسقا تۇسەدى. جالپى بۇل تۋرنيرگە ەلىمىزدىڭ 48 وكىلى قاتىسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى