توقايەۆ: بەت-ءجۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق
بۋراباي. KAZINFORM - ۇلتتىق بولمىسىمىزدىڭ ماڭىزدى كورىنىسى ۇلتتىق كيىمدى جان-جاقتى دارىپتەۋ كەرەك. بۇل تۋرالى ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ ايتتى.
- ۇلتتىق بىرەگەيلىگىمىزدى نىعايتۋ جولىندا مادەنيەت سالاسى ايرىقشا ءرول اتقارادى. اسىرەسە، ءتول مادەنيەتىمىزدەگى ءاز-ناۋرىز مەيرامىنىڭ ورنى بولەك. ناۋرىز مەرەكەسى تۋرالى جاڭا تۇجىرىمداما ازىرلەندى. ەلىمىز ۇلىستىڭ ۇلى كۇنىن 14- ناۋرىزدان، ياعني امال كۇنىنەن باستاپ، ون كۇن بويى اتاپ وتەتىن بولدى. ءار كۇنگە ناقتى اتاۋ بەرىلدى. جۇرتشىلىق بۇل باستامانى جاقسى قابىلدادى. اسىرەسە، ناۋرىزناماداعى «ۇلتتىق كيىم كۇنى» قوعامنىڭ زور قولداۋىنا يە بولدى. ۇلتتىق كيىمدەرگە دەگەن قىزىعۋشىلىق ارتا ءتۇستى، - دەدى قاسىم-جومارت توقايەۆ.
مەملەكەت باسشىسىنىڭ اتاپ وتۋىنشە، مەكتەپتەردە، ءتۇرلى مەكەمەلەردە، سونداي-اق، ءىرى كومپانيالاردا ۇلتتىق كيىمگە ءمان بەرىلە باستادى. سۇرانىسقا ساي تىگىن سەحتارى اشىلىپ، جاڭا برەندتەر، دۇكەندەر پايدا بولدى.
- وسىلايشا، ۇلتتىق كيىم كيۋ بىرتىندەپ قالىپتى كورىنىسكە اينالىپ كەلەدى. بۇل - وتە جاقسى ءۇردىس. بەت-ءجۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق. اسىرەسە، ايەلدەردىڭ ءداستۇرلى كيىمى وتە عاجاپ كورىنەدى. سەبەبى ۇلتتىق كيىم بۇل - ءبىزدىڭ بىرەگەي ۇلتتىق بولمىسىمىزدىڭ ماڭىزدى كورىنىسى. ونى جان-جاقتى دارىپتەۋىمىز كەرەك، - دەدى پرەزيدەنت.
بۇعان دەيىن مەملەكەت باسشىسى قازاقتىڭ بولمىسىنا جات يدەولوگيالارعا توسقاۋىل قويۋ قاجەتتىگىن ايتقان ەدى.
اۆتور
مارلان جيەمباي
