توقايەۆ: اۋىل شارۋاشىلىعىن جەمقورلار مەن الاياقتار يەمدەنىپ كەلدى
بۋراباي. KAZINFORM - قازاقستان الداعى بەس جىلدا اۋىل شارۋاشىلىعىنىڭ جالپى ءونىمىن ەكى ەسە كوبەيتىپ، سالانىڭ ەڭبەك ونىمدىلىگىن ءۇش ەسە ارتتىرۋ كەرەك. ۇلتتىق قۇرىلتايدىڭ 4-وتىرىسىندا مەملەكەت باسشىسى قاسىم-جومارت توقايەۆ ۇكىمەتتىڭ الدىنا وسىنداي مىندەت قويدى.
- قازاقستاننىڭ اۋىل شارۋاشىلىعىنداعى الەۋەتى زور ەكەنى بەلگىلى. ەندى سونى ءتيىمدى پايدالاناتىن كەز كەلدى. ەلىمىزدىڭ اۋەلگى مۇمكىندىكتەرىنە قاراساق، ءبىز الدەقاشان الەمدەگى الپاۋىت اگرارلىق مەملەكەتتىڭ ءبىرى بولۋعا ءتيىس ەدىك. ءبىراق اۋىل شارۋاشىلىعىنا جەتكىلىكتى قارجى سالىنعان جوق. بۇل سالانى جەمقورلار مەن الاياقتار يەمدەنىپ كەلدى. ولاردىڭ ىشىندە مەملەكەتتىك قىزمەتشىلەر دە بولدى. جالعان مالىمەتتەردىڭ كەسىرىنەن مەملەكەت قاعاز جۇزىندەگى مال سانىنا جىلدار بويى سۋبسيديا تولەدى، - دەدى مەملەكەت باسشىسى.
قاسىم-جومارت توقايەۆ وسى قوردالانعان ماسەلەنىڭ ءبارىن شەشۋ ءۇشىن كوپ جۇمىس جاسالىپ جاتقانىن اتاپ ءوتتى.
- ءبىز الداعى بەس جىلدا اۋىل شارۋاشىلىعىنىڭ جالپى ءونىمىن ەكى ەسە كوبەيتىپ، وسى سالاداعى ەڭبەك ونىمدىلىگىن ءۇش ەسە ارتتىرۋىمىز كەرەك. بۇل - وتە ماڭىزدى مىندەت. قازاقستان 10 جىل ىشىندە بيدايدى تەرەڭ وڭدەپ، دايىن ءونىم وندىرەتىن جانە ونى الەمدىك نارىققا شىعاراتىن ەڭ ۇزدىك ون ەلدىڭ قاتارىنا قوسىلۋعا ءتيىس، - دەدى پرەزيدەنت.
ايتا كەتۋ كەرەك، قۇرىلتايدىڭ پانەلدىك سەسسيالارى كەشە باستالعان. ول سەكسيالاردىڭ تاقىرىپتارى ازاماتتىق قوعام، مادەنيەت، ونەر، رۋحانيات، ءبىلىم جانە عىلىم، الەۋمەتتىك-ەكونوميكالىق دامۋ ماسەلەلەرىن قامتىدى.
