تولەن ابدىك ۇلى پرەزيدەنتكە: ءارى ۇيالتىپ، ءارى قۋانتىپ وتىرسىز

«حالىق جازۋشىسى دەگەن اتاقتى كەزىندە ءوزىمىز جاۋىپ تاستاپ ەدىك. سونى بۇگىن قايتادان اشىپ، ءبىزدى ءارى ۇيالتىپ، ءارى قۋانتىپ وتىرسىز. بۇل بىزگە قوسىمشا اسا تالاپ قويا قويماس. ءبىراق ونەرگە، ادەبيەتكە دەگەن جاڭا كوزقاراستىڭ بەلگىسى بولىپ، كوڭىلىمىزدى ۇلكەن سەنىمگە تولتىرىپ وتىر. ومىردە ادىلدىك، شىندىق، ادامگەرشىلىك دەگەن ۇلى قۇندىلىقتار بار. ادامي قارىم- قاتىناس، ءىس- ارەكەت، قوعامنىڭ ءومىرى، مەملەكەتتىڭ ساياساتى سوعان نەگىزدەلگەن كەزدە وركەنيەت كوشىنە قوسىلۋعا مۇمكىندىك اشىلادى. سول كوشتى باستاۋ سىزگە جۇكتەلدى. بۇل ارينە، اسا قاستەرلى، ءبىراق، اسا جاۋاپتى نارسە ەكەنىن بىلەمىز. قازاقتىڭ كوشىن تۋرا باستاپ، باسقا جولعا بۇرىلماي، كەدەرگىلەرگە ۇرىنباي حالىقتىڭ ءۇمىتىن اقتاعان ابىرويلى پرەزيدەنت بولعانىڭىزدى قالايمىز»، - دەدى قالامگەر اقوردادا وتكەن سالتاناتتى راسىمدە.

وسى رەتتە جازۋشى يتاليالىق ءبىر مەملەكەت قايراتكەرىنىڭ «ءبىز يتاليانى جاسادىق. ەندى يتالياندىقتاردى جاسايىق» دەگەن ايگىلى ءسوزىن ەسكە سالدى.

«ءبىز دە ىلگەرىندى- كەيىندى قازاقستاندى جاسادىق. ەندى كوزى اشىق، ساناسى ەركىن، عىلىم مەن ءبىلىمدى مەڭگەرگەن، وزگە وزىق ويلى ەلدەرمەن بوي تەڭەستىرە الاتىن زاماناۋي قازاق ۇلتىن جاساۋعا كۇش سالۋ كەرەك دەپ ەسەپتەيمىز. بۇل، ارينە، ورتاق مىندەت. بىزدە قولىمىزدان كەلگەنشە تىرىسىپ باعامىز. دامۋ دەگەن جاڭا ءبىر زاتقا قول جەتكىزۋ ەمەس. وتكەن قاتەلىكتەردى تۇزەۋ، قيسايعاندى تۇزەتۋ، قۇلاعاندى قالپىنا كەلتىرۋ»، - دەدى تولەن ابدىك ۇلى.

اۆتور

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى