توبەلەس ءجيى بولاتىن كوڭىل كوتەرۋ مەكەمەلەرىنىڭ جۇمىسىن توقتاتۋ ۇسىنىلدى
باس پروكۋرور بەرىك اسىلوۆ وتباسىنداعى زورلىق- زومبىلىقتىڭ جانە قوعامدىق ورىنداردا قۇقىق بۇزۋشىلىقتىڭ الدىن الۋ ماسەلەلەرى جونىندەگى ۇيلەستىرۋ كەڭەسىنىڭ وتىرىسىندا جانجال مەن قىلمىس ءجيى تىركەلەتىن مەكەمەلەردىڭ جۇمىسىن توقتاتۋدى ۇسىندى، دەپ حابارلايدى Kazinform.
باس پروكۋرور ىشىمدىك تۇتىنۋعا جانە كوڭىل كوتەرۋگە ارنالعان مەكەمەلەردىڭ جاۋاپكەرشىلىگىن ارتتىرۋ باعىتىندا تۇبەگەيلى شارالار قابىلداۋ قاجەتتىگىن ايتادى.
«كەلۋشىلەر اراسىندا بولعان جانجال تۋرالى مالىمدەمەگەن مەكەمەلەردىڭ اكىمشىلىگىنە جاۋاپكەرشىلىك ەنگىزۋ كەرەك. بۇل - ولاردىڭ الەۋمەتتىك مىندەتى. ونداي مەكەمەلەردە زاڭ ءجيى بۇزىلسا، جۇمىسىن ۋاقىتشا توقتاتۋ كەرەك نەمەسە قىزمەتىن جاۋىپ تاستاۋ كەرەك»، - دەدى بەرىك اسىلوۆ.
باس پروكۋرور «ادىلەتتى قازاقستاندى» زاڭ مەن ءتارتىپ ۇستەم بولعان كەزدە عانا قۇرۋعا بولاتىنىن اتاپ ءوتتى.
«كوشەدەگى مادەنيەتسىزدىكتەن باستاپ، ۇرلاۋ، توناۋ، ادام ولتىرۋگە دەيىنگى قىلمىستاردىڭ بارلىق تۇرىنە قارسى تۇرۋ - بۇگىنگى زامان تالابى.
اسىرەسە ايەلدەر مەن بالالارعا قاتىستى قىلمىستار حالىقتىڭ نارازىلىعىن تۋعىزادى.
قازاقستان قوعامى بۇگىنگى تۇرمىستىق زورلىق- زومبىلىققا قارسى شۇعىل جانە قاتاڭ شارالاردى قولدانۋدى تالاپ ەتۋدە.
«ەل بولام دەسەڭ - بەسىگىڭدى تۇزە» دەگەن تەرەڭ ماعىنالى ءسوز بار. ءاربىر وتباسى قوعامنىڭ ءبىر بولشەگى، شاعىن مەملەكەت»، - دەدى ول.
