توپاي اسىق جيناعان اقتوبەلىك كوللەكسيونەر گيننەسس رەكوردتار كىتابىنا ەنگىسى كەلەدى

شارۋا ەربولات قۋانىشوۆتىڭ ءبىر- ەكى اسىعى 13 جىلدا 3400 گە جۋىقتادى. قازىر ءوزى تۇراتىن ءۇيدىڭ سارايىن شەبەرحانا ەتىپ، كەلۋشىلەرگە ارناپ كورمە جاساقتاپ قويعان. ىشىندە قويدىڭ اسىعى، توپاي اسىقتان باستاپ، ءتۇرلى جىلىكتەن جاسالعان شەجىرە جيناعىن، قابىرعا مەن ومىرتقا، جاۋىرىن مەن مۇيىزدەن اسپالى شام جاساعان.

- 2012 -جىلى اسىق سانى كوبەيىپ، 2017 -جىلى ەكسپو-عا قاتىسۋعا ۇسىنىس ءتۇستى. ول كەزدە اسىق سانى از بولدى، بۇزاۋلى سيىر ءمۇسىنىن جاساۋ تۋرالى ويىم ىسكە اسپادى. قازىرگى كەزدە 3378 اسىق بار. ادامدار كەلىپ، قىزىقتاپ، تاماشالايدى. ءوزىم شارۋا يەسىمىن. سيىردىڭ بارلىق سۇيەگىن كادەگە جاراتامىن. ماسەلەن مۇيىزىنەن قىمىزعا ىدىس، قابىرعاسىنان اسپالى شام، تەرىسىن يلەپ، قامشىعا قايىس جاساۋعا بولادى. ال اسىق جيناۋ - حوببيىم، - دەدى ەربولات قۋانىشوۆ.

شارۋا سۇيەكتى تازارتۋدىڭ ءادىسىن شەبەر مەڭگەرگەن. ول قولىنا تۇسكەن توپايدى توڭازىتقىشقا سالا بەرەدى. سانى 40-50 گە جەتكەندە قازانعا سالىپ، 5-6 ساعات قايناتادى. مايى شىققان سوڭ ونى جۋىپ- شايىپ الادى. كەپكەن سوڭ عانا ءتۇرلى دۇنيە جاساۋعا بولادى.

- اسىقتان اسىقتىڭ ءمۇسىنىن جاساعىم كەلەدى. ءسويتىپ «اسىعىڭ الشىسىنان ءتۇسسىن!» دەپ جازباقپىن. ءمۇسىننىڭ بيىكتىگى 1,5 مەتر، ۇزىندىعىن ودان كوپ بولادى. اسىقتان تاق تا جاساعىم كەلەدى. سونىمەن بىرگە بۇزاۋلى سيىر جاساماقپىن. قازىر ينتەرنەتتى اشىپ قالسا، مۇمكىندىك مول. قاراپ وتىرىپ، ءتۇرلى زات جاساۋعا بولادى. سونىمەن بىرگە تۇيەنىڭ سۇيەگىنەن ۇلكەن اسپالى شام جاساعىم كەلەدى. جىلقى، سيىر سۇيەگىنەن شەجىرە جاسايمىن، - دەدى ەربولات قۋانىشوۆ.

قازاقستان بارىسى، اقتوبە بارىسى جارىستارىندا جەرەبە تارتۋ ءۇشىن شەبەردىڭ جيعان اسىعى پايدالانىلادى. سونىمەن بىرگە اۋدان، اۋىلدار دا الادى.

- گيننەسس رەكوردتار كىتابىنا ەنگىم كەلەدى. بۇل جەتىستىك ءارى ادامدى ىنتالاندىراتىن سەرتيفيكات بولار ەدى. قازىر قۇجاتتارىن جيناپ جاتىرمىز. ەكى اي بۇرىن حات جولداعان ەدىك. اسىقتى ساتىپ العىسى كەلەتىن ادامدار بولدى، ءبىراق جيعان ەڭبەگىم بار، ساتپادىم، - دەدى كوللەكسيونەر.

ەسكە سالساق، اقتوبەدە مەكتەپ وقۋشىلارى اراسىندا اسىق اتۋ ويىنى كەڭ تاراپ كەلەدى. قازىر بىرنەشە مەكتەپتە اسىق ۇيىرمەسى تەگىن وتكىزىلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى