توپارداعى ءسىبىر جاراسى: ەكىنشى ناۋقاستىڭ جاعدايى كۇرت ناشارلادى
قاراعاندى وبلىسىندا ءسىبىر جاراسى دياگنوزى راستالعان تاعى ءبىر ناۋقاستىڭ جاعدايى ناشارلادى. ول رەانيماتسيا بولىمىنە اۋىستىرىلدى. ناۋقاستا تەرى- قابىنۋ سيندرومى ءورشىپ تۇر، دەپ حابارلايدى Kazinform ءتىلشىسى.
«بۇگىنگى تاڭدا ءسىبىر جاراسى دياگنوزى راستالعان ەكى ناۋقاس ەم الىپ جاتىر. 62 جاستاعى پاتسيەنتتە تۇينەمەنىڭ تەرىدەگى ءتۇرى تىركەلگەن. تەرى- قابىنۋ سيندرومىنىڭ كۇشەيۋىنە جانە ءىسىنۋ كولەمىنىڭ ۇلعايۋىنا بايلانىستى رەانيماتسيا جانە قارقىندى تەراپيا بولىمىنە اۋىستىرىلدى. ەكىنشى ناۋقاس 41 جاستا، ينفەكتسيا ورتالىعىنىڭ نەيروبوكس بولىمىندە جاتىر. جاعدايى ورتاشا اۋىر. تولىق كولەمدە ەم الىپ جاتىر» ، — دەپ مالىمدەدى قاراعاندى وبلىسى دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا.
ەسكە سالساق، قاراعاندى وبلىسىنىڭ توپار كەنتىندە كارانتين جاريالاندى. ەلدى مەكەننەن ءسىبىر جاراسى تابىلدى.
كەيىن كەنتتە تاعى ءۇش ادامنىڭ وسى دەرتتى جۇقتىرعانى بەلگىلى بولدى.
دارىگەرلەر ءبىر پاتسيەنت اۋىر حالدە ەكەنىن حابارلادى.
ءسىبىر جاراسىنىڭ وشاعى انىقتالعان توپار كەنتىنەن جەتكىزىلگەن ءتورتىنشى پاتسيەنتتىڭ تالداۋى تەرىس ناتيجە كورسەتتى.
بۇگىن تۇندە ءبىر ناۋقاس كوز جۇمدى.
