تۇرىك پوليتسياسى ميتينگكە 2,2 ميلليون ادامنىڭ قاتىسقانىن جوققا شىعاردى
استانا. KAZINFORM - قۇقىق قورعاۋ ورگاندارىنىڭ مالىمەتتەرى بويىنشا تۇركيانىڭ مالتەپە اۋدانىنداعى اۋماققا ەڭ كوپ دەگەندە 450 مىڭ ادام سىيادى، دەپ حابارلايدى تاسس.
تۇركيانىڭ باس قاۋىپسىزدىك باسقارماسى وپپوزيتسيا جەتەكشىسى وزگۇر وزەلدىڭ قاماۋعا الىنعان مەر ەكرەم يماموعلىعا قولداۋ كورسەتۋ ءۇشىن ىستامبۇلداعى ميتينگكە 2,2 ميلليون ادام قاتىستى دەگەن مالىمدەمەسىن جوققا شىعاردى. ۆەدومستۆو اتاپ وتكەندەي، وعان 150 مىڭ ادام قاتىستى.
- مالتەپە اۋدانىنداعى اۋماق ەڭ كوپ دەگەندە 450 مىڭ ادامدى قامتي الادى. حالىقتىق- رەسپۋبليكالىق پارتيانىڭ ميتينگىسىنە 150 مىڭ ادام قاتىستى، - دەلىنگەن حابارلامادا.
حالىقتىق- رەسپۋبليكالىق پارتيا جەتەكشىسى سەنبىدە ىستامبۇلدىڭ مالتەپە اۋدانىندا وتكەن ميتينگتە تۇركيادا مەرزىمىنەن بۇرىن پرەزيدەنتتىك سايلاۋ وتكىزۋ ماقساتىندا قول جيناۋ ناۋقانى باستالعانىن مالىمدەدى.
ايتا كەتەيىك، 19-ناۋرىزدا تۇركيادا ىستامبۇل ءمەرى جانە وپپوزيتسيا جەتەكشىلەرىنىڭ ءبىرى ەكرەم يماموعلى سىبايلاس جەمقورلىق جاسادى جانە تەرروريستەرمەن بايلانىستا بولدى دەگەن ايىپپەن ۇستالعاننان كەيىن تۇركيادا نارازىلىق اكسيالارى ءوتتى.
ىستامبۇلدا جينالىستار مەن ميتينگىلەرگە تىيىم سالىنعانىنا قاراماستان، ەلدىڭ بىرنەشە پروۆينسياسىندا نارازىلىقتار ءوتتى.
23-ناۋرىزدا ەكرەم يماموعلى تۇركيا پرەزيدەنتتىگىنە كانديدات رەتىندە ۇسىنىلدى.
تۇركيا ءىىم مالىمەتىنشە، ميتينگتە كەمىندە 1,8 مىڭ ادام ۇستالىپ، 260 ى قاماۋعا الىندى. ەڭ اۋقىمدى نارازىلىق اكسيالارى ىستامبۇل، انكارا جانە يزميردە ۇيىمداستىرىلدى. وپپوزيتسيا جەتەكشىسى ىستامبۇلداعى سەنبى كۇنى وتكىزىلگەن ميتينگتى ەڭ اۋقىمدى دەپ اتادى.
