پەتروپاۆلداعى جاڭا زاماناۋي اۋرۋحانا مىندەتتى تۇردە قولدانىسقا بەرىلەدى - ۆياچەسلاۆ دۋدنيك
پەتروپاۆلدا زاماناۋي كوپبەيىندى اۋرۋحانانىڭ قۇرىلىسىن جەدەلدەتۋ بويىنشا ءتيىستى جۇمىستار اتقارىلىپ جاتىر. بۇگىن باق وكىلدەرى نىساننىڭ ناقتى قاشان قولدانىسقا بەرىلەتىندىگىن وڭىرگە جۇمىس ساپارىمەن كەلگەن دەنساۋلىق ساقتاۋ ءمينيسترىنىڭ ورىنباسارى ۆياچەسلاۆ دۋدنيكتەن بىلمەك بولدى، دەپ حابارلايدى Kazinform.
پەتروپاۆلدا ءتورت جىل بۇرىن ىرگەتاسى قالانعان زاماناۋي اۋرۋحانا جوسپار بويىنشا 2,5-3 جىلدا سالىنىپ، پايدالانۋعا بەرىلۋى ءتيىس ەدى. الايدا بۇگىندە نىسان «ساقالدى» قۇرىلىسقا اينالعان.
«YDA Group» تۇرىك كومپانياسى سالىپ جاتقان اۋرۋحانا سولتۇستىك قازاقستان وبلىسى ءۇشىن ماڭىزدى جوبا. سوندىقتان وڭىرگە جۇمىس ساپارىمەن كەلگەن ق ر دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيككە بريفينگتە قويىلعان العاشقى سۇراق تا وسى نىسان جايىندا بولدى.
«اۋرۋحانا مەملەكەتتىك جەكەمەنشىك ارىپتەستىك اياسىندا سالىنىپ جاتىر. ونى ىسكە قوسۋ ءۇشىن بىرنەشە كەزەڭنەن ءوتۋ كەرەك. ەڭ الدىمەن جوبالىق-سمەتالىق قۇجاتى جاسالۋى ءتيىس. نىساندى تۇرعىزۋ ءۇشىن جانە زاماناۋي قوندىرعىعا قانشا قاراجات كەرەكتىگى انىقتالادى. مەملەكەتتىك ساراپتاما جۇرگىزىلۋى كەرەك. كەيىن ۇكىمەتتىڭ ارنايى كوميسسياسى قاراستىرىپ، سودان سوڭ نىساندى قوسۋ تۋرالى شەشىم قابىلدايدى. ونى تۇرىك قۇرلىسشىلارى سالىپ جاتىر. ولاردىڭ تاجىريبەسى مول»، - دەدى ۆياچەسلاۆ دۋدنيك.
ۆيتسە-ءمينيستردىڭ ايتۋىنشا، ءدال وسىنداي جوبا تۇركىستاندا دا ىسكە اسىرىلىپ جاتىر. ول وڭىردە ءبىراز جۇمىس اتقارىلدى.
«جوبا مىندەتتى تۇردە پەتروپاۆلدا ىسكە قوسىلادى. ناتيجەسىندە س ق و تۇرعىندارى ءۇشىن كورسەتىلەتىن مەديتسينالىق قىزمەتتىڭ ساپاسى وتە جوعارى دەڭگەيگە كوتەرىلەدى. ويتكەنى ينۆەستور قۇرىلىس نىسانىن سالىپ قانا قويماي، دارىگەرلەردى تاڭداپ، تۇركياعا وقۋعا اپارىپ، بىلىكتىلىگىن جوعارىلاتۋدى كوزدەپ وتىر. سونداي-اق جاڭا اۋرۋحاناعا جەتەكشى مامانداردى جۇمىس ىستەۋگە شاقىرماقشى. سوندىقتان ءبىز بارلىعىمىز بۇل كلينيكانىڭ ىسكە قوسىلعانىن اسىعا كۇتىپ وتىرمىز.
ەگەر جوبا پەتروپاۆلدا جانە تۇركىستاندا ءساتتى اياقتالاتىن بولسا، مۇنداي زاماناۋي اۋرۋحانالار باسقا وڭىرلەردە دە سالىنادى»، - دەدى ءمينيستردىڭ ورىنباسارى.
جيىندا كادر ماسەلەسى دە كوتەرىلدى. بۇگىندە س ق و-دا 134 دارىگەردىڭ ورنى بوس تۇر.
«مەديتسينا ماماندارى ەل بويىنشا جەتىسپەيدى. سەبەبى، دارىگەر - وتە جاۋاپكەرشىلىگى مول ماماندىق. ولار ەڭ از دەگەندە 6 جىل وقيدى. قازىر قوعامدا دارىگەرگە دەگەن قۇرمەت ازايىپ بارادى. جاقىندا عانا وسى سىزدەردىڭ وڭىرلەرىڭىزدە دارىگەردى سوققىعا جىقتى. بۇل دۇرىس ەمەس. وسىنداي وقيعالاردان كەيىن جاستار بۇل سالانى تاڭداعىسى كەلمەيدى»، - دەدى ۆياچەسلاۆ دۋدنيك.
اۆتور
ەربول جانات
