پەتروپاۆلدا وتكەن كوماندالىق ايتىستا استانالىق ونەرپازدار جەڭىسكە جەتتى

ايتىسكەر- اقىندار مەن جىرشى- تەرمەشىلەردىڭ حالىقارالىق وداعى جانە «AMANAT» پارتياسى ۇيىمداستىرعان جوبا بىلتىر باستالىپ، بيىل جالعاسىن تاپتى. ەل كولەمىندە ۇيىمداستىرىلعان مەگا جوباعا قاتىسقان 20 كوماندانىڭ 10 ى كەلەسى كەزەڭگە ءوتىپ باق سىنادى. ونىڭ قاتارىندا سولتۇستىكتىڭ ونەرپازدارى دا بار، ءبىرىنشى كەزەڭدە ولار شىعىس قازاقستان وبلىسىنىڭ كومانداسىمەن ساحنادا كەزدەسىپ، جەڭىسكە جەتتى.

بۇل جولعى كەزەڭ «ەڭبەك ادامى - ەل ماقتاناشى» تاقىرىبىندا ءوتتى.

- ءبىرىنشى اينالىمنان وتكەن 10 قۇراما ىشىنەن جارتىلاي فينالعا وتكەندەردى سارالايتىن بولامىز. جارتىلاي فينال مامىر ايىندا استانادا وتەدى. بۇگىن سولتۇستىك قازاقستان مەن استانا قالاسىنىڭ قۇرامالارى سايىسادى. ولار كورەرمەنگە قازاقتىڭ بەكزات ونەرى - ايتىستى كورسەتەدى دەگەن ويدامىن، - دەدى مەگا-جوبانىڭ اۆتورى امانجول التايەۆ.

قازىلار القاسىن قازاقستاننىڭ ەڭبەك سىڭىرگەن قايراتكەرى ءجۇرسىن ەرمان باستادى. ءار ونەر كورسەتكەن جۇپتىڭ باعاسىن سول سالانىڭ مامانى عانا باعالاي الدى.

قوس ءوڭىر اراسىندا وتكەن ونەر بايگەسىندە اقىندار «تۇرە»، «سۇرە»، «قايىم» جانە «قىز بەن جىگىت ايتىسى» جانرلارى بويىنشا سىنعا ءتۇستى. سونىمەن قاتار كۇي، جىر، تەرمە جانە ءداستۇرلى ءان بويىنشا دا مىقتىلار انىقتالدى. مەگا جوبانىڭ بۇل كەزەڭىندە تەرىسكەي كومانداسىندا وزگەرىس بار. تەرمەنى مەيرامگۇل زدۋاليەۆا ايتسا، كۇي تارتۋعا اسحات عالەيەۆ شىقتى. قىز بەن جىگىت ايتىسىندا بەردەنبەك مىرزات باق سىنادى.

«وسىدان ءبىر اي بۇرىن، ناۋرىز مەرەكەسىنە وراي ۇيىمداستىرىلعان ايتىستا كوماندامىز سولتۇستىكتىڭ ونەرىن كورسەتىپ، سال-سەرى، باتىرلاردىڭ ۇرپاعى ەكەنىمىزدى دالەلدەي الدىق. جىر- تەرمە، ءداستۇرلى ءان سىنىنا تۇسەتىن جىگىتتەرىمىز سايدىڭ تاسىنداي ىرىكتەلگەن. وسى جولى دا جەڭىستەن ءۇمىت بار. استانا قالاسىنىڭ كومانداسىن ايتىسكەر اقىن سەرىكزات دۇيسەنعازى باستاپ كەلىپ وتىر. ولار دا ءتىس قاققان ونەرپازدار. ءبىراق، ءبىزدىڭ قىز-جىگىتتەر دە وسال ەمەس. بابالاردان ميراس بولىپ قالعان ونەردى ۇلىقتاپ جۇرگەن جاندار، - دەدى ۇيىمداستىرۋشى ءارى ايتىسكەر اقىن جارقىن جۇپارحان.

ءبىر ايدا ەكىنشى رەت ءوتىپ وتىرعان دوداعا كەلگەن قاۋىم كوپ. قازاقتىڭ كۇمبىرلەگەن كۇيى مەن توگىلگەن جىرى كەلگەن كورەرمەننىڭ دەلەبەسىن قوزدىرىپ، قيقۋعا باستى. ەسىلدىڭ جاعاسىندا تۋعان ۇلى تۇلعالاردىڭ مەرەيتويلارى تۋرالى دا ءسوز قوزعالدى. بۇل قوجابەرگەن جىراۋ مەن شال اقىن، سەگىز سەرىنىڭ ونەرى ءالى دە وشپەي كەلە جاتقانىن كورسەتەدى. قازاقتىڭ قارا دومبىراسىن شەرتىپ، ءتۇرلى كۇيدى توگىلتكەن، سۋىرىپ سالمالىعىمەن كوزگە تۇسكەن جانە دە قازاقتىڭ كەڭ دالاسىنا ءان سالىپ داۋىسىن جەتكىزگەن ونەرپازدار كورەرمەن قوشەمەتىنە بولەندى. ايتىسكەرلەر بولسا قاعىتپا سوزدەر ارقىلى ءبىر- ءبىرىن شىمشىپ ءوتىپ، قوعامداعى وزەكتى ماسەلەلەردى دە كوتەرە ءبىلدى.

دودانىڭ قورىتىندىسى بويىنشا استانا قالاسىنىڭ كومانداسى باس جۇلدەنى جەڭىپ الىپ، رەسپۋبليكالىق ايتىستىڭ كەلەسى كەزەڭىنە جولداما الدى. جەڭىمپاز كوماندا مۇشەلەرىنە: ءار اقىنعا - 500 مىڭ تەڭگەدەن، ال جىرشى، تەرمەشى، ءداستۇرلى ءانشى جانە كۇيشىلەرگە - 250 مىڭ تەڭگەدەن بەرىلدى.

بۇعان دەيىن س ق و-دا «قازاق ءتىلى» قوعامىنىڭ 35 جىلدىق مەرەيتويى اتالىپ وتكەنىن جازعان ەدىك.

اۆتور

اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى