پەتروپاۆلدا وق تيگەن اسكەري قىزمەتشى اۋرۋحانادا قايتىس بولدى
پەتروپاۆلدا ۇلتتىق ۇلاننىڭ 6637 اسكەري ءبولىمىنىڭ جاۋىنگەرى قىزمەت بارىسىندا جارالانىپ، اۋرۋحانادا كوز جۇمدى، دەپ حابارلايدى Kazinform.
وقىس وقيعانىڭ بولعانىن ق ر ۇلتتىق ۇلانى باسپا ءسوز قىزمەتى راستادى.
«12- قاراشا كۇنى 6637 اسكەري ءبولىمنىڭ كەلىسىمشارت بويىنشا قىزمەت ەتەتىن اسكەري قىزمەتشىسى ارىپتەسىنىڭ ابايسىزدا وق اتۋىنان جارالاندى. ەر ادام شۇعىل تۇردە مەديتسينالىق مەكەمەگە جەتكىزىلدى، الايدا اسكەري قىزمەتشىنى امان الىپ قالۋ مۇمكىن بولمادى»، - دەلىنگەن حابارلامادا.
قازىرگى ۋاقىتتا قىزمەتتىك تەرگەۋ ءجۇرىپ جاتىر، وقيعانىڭ ءمان-جايى انىقتالۋ ۇستىندە.
پەتروپاۆل قالاسىنىڭ اسكەري پروكۋرورى مەيىرجان قاسىمجانوۆ وسى وقيعاعا تۇسىنىك بەردى.
«قايتىس بولعان 6637 اسكەري ءبولىمىنىڭ سەرجانتى چۋجيكوۆ. ق ر ءى ءى م ورتالىق-وڭىرلىك اسكەري تەرگەۋ باسقارماسىنىڭ پەتروپاۆل توبى ق ر قىلمىستىق كودەكسىنىڭ 462- بابى، 2- بولىگى بويىنشا سوتقا دەيىنگى تەرگەۋدى باستادى. وسى فاكتىگە قاتىستى تەرگەۋ امالدارى ءجۇرىپ جاتىر. ءتيىستى سوت ساراپتامالارى تاعايىندالدى. اسكەري قىزمەتشى وق جاراقاتىن العاننان كەيىن ارىپتەستەرى ونى بىردەن مەديتسينالىق مەكەمەگە جەتكىزدى، ءبىراق رەانيماتسيالىق شارالار جۇرگىزىلگەنىمەن دارىگەرلەر ونىڭ ومىرىنە اراشا تۇسە المادى. وزگە اقپارات قىلمىستىق-پروتسەسۋالدىق كودەكستىڭ 201- بابىنا سايكەس جاريا ەتىلمەيدى»، - دەدى مەيىرجان قاسىمجانوۆ.
