پەتروپاۆلدا ەر ادام «بالامنىڭ، ايەلىمنىڭ ەمىنە» دەپ جۇرتتى الداپ، 7 جىل اقشا جيناپ كەلگەن
پەتروپاۆل. KAZINFORM - پەتروپاۆلدا جۇرتتى الداپ، بىرنەشە جىل اقشا جيناعان ەر ادام 5 جىلعا سوتتالدى.
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 37 جاستاعى پەتروپاۆل تۇرعىنى ايەلىن نەمەسە بالالارىن ەمدەيتىنىن ايتىپ، 2016 -جىلدان بەرى تانىستارىنان ءتۇرلى سومادا «قارىزعا» دەپ اقشا الىپ كەلگەن. ءتىپتى قولحات جازىپ، «ۇستىنەن اقشا قوسىپ قايتارامىن» دەپ ايتقان.
الايدا، سوزىندە تۇرماعان. جينالعان اقشانى ءوزىنىڭ قاجەتىنە جاراتقان. الاياقتىقتىڭ قۇرباندارى ونىڭ قايتا-قايتا ايتقان ۋادەلەرىنە سەنىپ، ابدەن شىدامدارى تاۋسىلعان سوڭ، تەك 2023 -جىلى عانا پوليتسياعا جۇگىنە باستاعان.
قىلمىستى تەرگەۋمەن اينالىسقان پەتروپاۆلدىق پوليتسەيلەر وسى ىسكە قاتىستى 14 ەپيزودتى انىقتادى. الاياق تانىستارىنا 270 مىڭنان 15 ميلليون تەڭگەگە دەيىن شىعىن كەلتىرگەن.
تەرگەۋشىلەردىڭ مۇقيات جۇرگىزگەن جۇمىسىنىڭ ناتيجەسىندە بۇل ءىس ق ر قىلمىستىق كودەكسىنىڭ 190-بابى «الاياقتىق» بويىنشا سوتقا جىبەرىلدى. پەتروپاۆل قالالىق سوتى كۇدىكتىنى ايىپتى دەپ تانىدى. وعان 5 جىلعا باس بوستاندىعىنان ايىرۋ تۇرىندەگى جازا تاعايىندالدى. سونداي- اق ول كەلتىرگەن شىعىندى دا وتەيدى.
سوت ۇكىمى زاڭدى كۇشىنە ەنبەدى.
اۆتور
اقەركە داۋرەنبەك قىزى
