پەتروپاۆلدا قازداردىڭ جارىسى وتەدى

العاش رەت ۇيىمداستىرىلىپ وتىرعان ءىس- شارا 5-ساۋىرگە جوسپارلانعان. فەستيۆالدىڭ باعدارلاماسى اۋقىمدى، بۇل كۇنى ماجارستان، تاتارستان، باشقۇرتستان جانە باسقا دا ەلدەردەن كەلگەن جانە قازاقستاندىق جەتەكشى قاز وسىرۋشىلەر جانە ساراپشىلار فورۋمعا قاتىسىپ، تاجىريبەلەرىمەن بولىسەدى. كەيىن ن. پوگودين اتىنداعى وبلىستىق دراما تەاترى الاڭىندا اسىل تۇقىمدى قازداردىڭ كورمەسى وتەدى.

سونداي-اق جەرگىلىكتى جانە شەتەلدىك اسپازدار قاز ەتىنەن ءدامدى تاعام ازىرلەپ جارىسادى.
ال قازداردىڭ جارىسى فەستيۆالدىڭ كورىگىن قىزدىرا تۇسپەك.

بۇل باستاما — «اۋىل» پارتياسىنىكى.

- حالىقارالىق ەتنومادەني فەستيۆالدى ۇيىمداستىرۋداعى ماقسات - حالىقتىڭ نازارىن قاز شارۋاشىلىعىنا اۋدارتۋ. سولتۇستىك قازاقستان وبلىسىندا قۇستىڭ بۇل ءتۇرىن وسىرۋگە جاعداي قولايلى. كولدەرگە باي، ءشوبى شۇيگىن. ءقازىر رەسمي ەمەس مالىمەت بويىنشا، ءوڭىر جىلىنا نەبارى 1,2 ميلليون عانا وسىنداي قۇس وسىرەدى. بۇل از. ارنايى فەرمالار جوق، - دەيدى ءىس- شارانى ۇيىمداستىرۋشىلاردىڭ ءبىرى ءال فارابي مىڭباي.

بۇل كۇنى قاز بالاپانى دا 1,5 مىڭ تەڭگەدەن ساتىلماق.

- بالاپان جارتى جىلدا جەتىلەدى. 1,5 مىڭ تەڭگەگە الىپ، ءبىر داناسىن 15 مىڭ تەڭگەگە ساتۋعا بولادى. مىسالى بيىل قىستا كوتەرمە باعامەن الۋشىلار ونىڭ كەلىسىن 2,8 مىڭ تەڭگەدەن الدى. بازاردا 3,5 مىڭ تەڭگەدەن تۇردى. جەلتوقسان ايىندا قۇس ەتىنە سۇرانىس كۇرت ارتادى. ەتىنەن عانا ەمەس، مامىعىنان دا پايدا كورۋگە بولادى. پەتروپاۆلداعى فيرما ونىڭ كەلىسىن 10 مىڭ تەڭگەدەن الادى، ال رەسەيلىكتەر كەلىپ 12 مىڭ تەڭگەدەن اكەتەدى ەكەن، - دەيدى ءال فارابي مىڭباي.

ۇيىمداستىرۋشىلاردىڭ ايتۋىنشا، قازدار جارىسى العاش رەت وتكىزىلەتىن بولعاندىقتان، ونى قالجىڭ دەپ قابىلداپ، سەنىمسىزدىك تانىتىپ جاتقاندار كوپ ەكەن. ازىرگە 16 قاز يەسىنەن عانا ءوتىنىش تۇسكەن.

- قازىمەن كەلىپ قاتىسقاندارعا 10 مىڭ تەڭگە بەرەمىز. ال ەگەر جەڭىسكە جەتىپ جاتسا، ءبىرىنشى ورىن ءۇشىن 75 مىڭ تەڭگە، ەكىنشى ورىنعا 50 مىڭ تەڭگە، ءۇشىنشى ورىنعا 25 مىڭ تەڭگە سىياقىمىز بار. جارىستىڭ ءوز ءتارتىبى بار، قازدى مارەگە تەز جەتۋى ءۇشىن ۇرۋعا بولمايدى، - دەيدى ءال فارابي مىڭباي.

بۇعان دەيىن س ق و ستۋدەنتتەرى «سەرپىندى» ناسيحاتتاۋعا وڭتۇستىك وبلىستارعا اتتانعانىن جازدىق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى