پەتروپاۆلدا قازاق كينوسىنىڭ اپتالىعى باستالدى

ۇيىمداستىرۋشىلاردىڭ ايتۋىنشا، بۇعان دەيىن قاراعاندى جانە جامبىل وبلىستارىندا وتكەن ءىس- شارا بارىسىندا كورەرمەن نازارىنا ون فيلم ۇسىنىلادى.

- ۇلتتىق كينونى قولداۋ ورتالىعى ايماقتاردا قازاق كينوسىنىڭ كۇندەرىن وتكىزۋدى قولعا العان بولاتىن. ونداعى ماقسات - ق ر مادەنيەت جانە اقپارات مينيسترلىگى مەن كينو ورتالىقتىڭ قولداۋىمەن تۇسىرىلگەن فيلمدەردى حالىققا ۇسىنۋ. بۇل - تۇرعىنداردىڭ ەل ءۇشىن تاسپالانعان تۋىندىلارمەن تانىسۋىنا جاسالعان قادام. ون كۇنى بويى ايماقتا ۇلتتىق كينو كورسەتىلەدى. اۋداندار مەن اۋىلداردا دا ورتالىقتىڭ كارتينالارىن تاماشالاۋعا مۇمكىندىك بولادى. الىپ كەلگەن فيلمدەردىڭ جانرى مەن مازمۇنى الۋان. جەكەلەي جىكتەسەك، «پاتريوتتار ۋاقىتى» كينوسى قۇقىق قورعاۋشىلاردىڭ ەڭبەگىن دارىپتەسە، «جامبىل. جاڭا ءداۋىر»، «دوس- مۇقاسان» ارقىلى تۇلعالارىمىزدىڭ ءجۇرىپ وتكەن جولىنا قانىعۋعا بولادى. ال «باۋىرىنا سالۋ» دەپ اتالاتىن كينودا ءداستۇرىمىز دارىپتەلىپ، ۇلتقا دەگەن سۇيىسپەنشىلىك سەزىمى ەسەلەنبەك. كىشكەنتاي كورەرمەندەرىمىزدى دە ەستەن شىعارماي، «تايقازان» دەپ اتالاتىن بالالارعا ارنالعان انيماتسيالىق تۋىندىنى دا الا كەلدىك، - دەيدى «ۇلتتىق كينونى قولداۋ» مەملەكەتتىك ورتالىعىنىڭ باسقارما ءتوراعاسى قۇرمانبەك جۇماعالي.

كينو ورتالىعىنىڭ قولداۋىمەن ەلىمىزدە 117 تۋىندى جارىق كورگەن. ونىڭ 72 ءسى كوركەم، 37 ءسى دەرەكتى، ال قالعان 8 ءى انيماتسيالىق فيلمدەر.

پەتروپاۆلداعى اپتالىق «پاتريوتتار ۋاقىتى» فيلمىمەن اشىلدى. فيلمدەگى باستى رولدەردى سانۇرجان سۇلەيمەنوۆ پەن دانيار الشىنوۆ سومدادى. سونداي-اق كارتيناعا داستەن شاكىروۆ، زارينا حادجيمەتوۆا، اسقار ءىلياسوۆ، سايات يسەمبايەۆ جانە ت. ب. تالانتتى اكتەرلەر تۇسكەن.

- كينونى تۇسىرۋگە شامامەن 1 جىلدان استام ۋاقىت كەتتى. قانشاما ەڭبەكتىڭ ارقاسىندا ءفيلمىمىز كوپشىلىكتىڭ كوڭىلىنەن شىقتى دەپ ويلايمىن. تريللەر جانرىنداعى فيلمدە ديناميكالىق- ەكشن قولدانىلعان، - دەيدى فيلم رەجيسسەرى سەرىكبول وتەپبەرگەنوۆ.

قازاق كينوسىنىڭ اپتالىعى س ق و- دا 14-ساۋىرگە دەيىن جالعاسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى