پەتروپاۆل كوشەلەرىندەگى قازاقشا اۋدارمالاردى كورىپ، نە كۇلەرىڭدى، نە جىلارىڭدى بىلمەيسىڭ
پەتروپاۆل. KAZINFORM - پەتروپاۆلدا بىلتىر ءتىل ماماندارى 80 نىسانعا مونيتورينگ جۇرگىزىپ، زاڭ بۇزۋدىڭ 30 دەرەگىن انىقتادى. قاتەگە جول بەرگەندەر ەسكەرتۋمەن عانا شەكتەلگەن.
پەتروپاۆلداعى كەي ساۋدا ورىندارىنداعى كورنەكى اقپارات ءبىر جونگە كەلمەي قويدى. وبلىس ورتالىعىنداعى «بەرەكە» شاعىن اۋدانىنىڭ تۇرعىنى جايناگۇل تەمىرحانوۆانىڭ ايتۋىنشا، كەي اۋدارمالاردى كورىپ، نە كۇلەرىڭدى، نە جىلارىڭدى بىلمەيسىڭ.
«ستاقاندى «شىنىدان راحاتتانىڭىز» دەپ اۋدارعان. مۇنداي قاتەلەر ءورىپ ءجۇر. اشىلعان بەتتى كورە سالىسىمەن اكىمشىلىگىن ەسكەرتتىم. ءبىراق ءسوزىمدى قۇلاعىنا قىستىرعان ادام بولمادى. ءۇيىمنىڭ جانىندا تۇر، سوندىقتان بارماي قويماۋعا تاعى بولمايدى. كەلگەن سايىن كوڭىلىم قۇلازىپ شىعادى. ىشىندەگى قىزمەتكەرلەرىنىڭ باسىم بولىگى وزگە ۇلت وكىلى. ولار بايىبىنا بارماي، ارنايى قوسىمشالار ارقىلى اۋدارا سالادى. ەشكىم تەكسەرىپ جاتقان جوق»، - دەيدى پەتروپاۆل تۇرعىنى جايناگۇل تەمىرحانوۆا.
سىرتقى جارناما مەن كورنەكى اقپاراتتىڭ دۇرىس جازىلۋىن قاداعالاۋ پەتروپاۆل قالاسى اكىمدىگىنىڭ مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمىنىڭ قۇزىرەتىندە.
مامانداردىڭ ايتۋىنشا، مونيتورينگ جۇرگىزىلەدى، ادىستەمەلىك جانە ءتۇسىندىرۋ جۇمىستارى دا قولعا الىنعان.
«سيەۆەرنىي» ساۋدا جەلىسىندەگى كورنەكى اقپارات ماتىندەرىنە مونيتورينگ جاسالدى، انىقتالعان قاتەلەردى تۇزەتىپ جاتىر. جالپى ولقىلىقتى جويۋعا 30 كۇن مەرزىمىندە ۋاقىت بەرىلەدى.
«قازاقستان رەسپۋبليكاسىنداعى ءتىل تۋرالى» زاڭنىڭ 21-بابىنا سايكەس حابارلاندىرۋلار، جارناما، پرەيسكۋرانتتار، باعا بەلگىلەرى، مازىرلەر، كورسەتكىشتەر جانە باسقا دا كورنەكى اقپارات مەملەكەتتىك تىلدە، قاجەت بولعان جاعدايدا ورىس نەمەسە باسقا تىلدەردە كورسەتىلەدى.
مونيتورينگ بارىسىندا بايقاعانىمىز - نەگىزىنەن ماتىندەر تەك ورىس تىلىندە ورنالاستىرىلادى نەمەسە اۋدارمالار سوزبە- ءسوز ماعىنادا قولدانىلادى»، - دەيدى پەتروپاۆل قالاسى اكىمدىگىنىڭ مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمىنىڭ باسشىسى رۋسلان سەڭكىبايەۆ.
كورنەكى اقپاراتتى تەكسەرۋگە مونيتورينگ جىل بويى جۇرگىزىلەدى. بىلتىر 80 نىساندى قامتىپ، ولاردا زاڭ بۇزۋدىڭ 30 دەرەگىن انىقتاعان. ودان بولەك تۇرعىنداردان 18 ءوتىنىش كەلىپ تۇسكەن. بۇگىندە قاتەلىكتەردىڭ ءبارى تۇزەتىلگەن.
«اكىمشىلىك قۇقىق بۇزۋشىلىق تۋرالى كودەكستىڭ 75-بابى، 3-تارماعىنا سايكەس دەرەكتەمەلەر مەن كورنەكى اقپاراتتى ورنالاستىرۋ جونىندەگى تالاپتاردى بۇزعانى ءۇشىن ەسكەرتۋ بەرىلەدى، ال اكىمشىلىك جازا قولدانىلعاننان كەيىن ءبىر جىل ىشىندە قايتالاپ جاسالعان ءىس-ارەكەت لاۋازىمدى ادامدارعا، شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا - 5، ورتا كاسىپكەرلىك سۋبەكتىلەرىنە – 10، ءىرى كاسىپكەرلىك سۋبەكتىلەرىنە 25 ا ە ك مولشەرىندە ايىپپۇل سالىنادى. الايدا بۇگىنگى كۇنى اكىمشىلىك ايىپپۇل سالۋ الگوريتمى بەكىتىلمەگەن، سوندىقتان بۇل قۇقىق نورماسى قولدانىلمايدى. وسىعان بايلانىستى پەتروپاۆل اكىمدىگى س ق و اكىمدىگىنىڭ مادەنيەت، تىلدەردى دامىتۋ جانە مۇراعات ءىسى باسقارماسىنا، پەتروپاۆل پروكۋراتۋراسىنا ءتۇسىندىرۋ تۋرالى حات جولدادى»، - دەيدى رۋسلان سەڭكىبايەۆ.
بيىل ءتىل ءبولىمى ماماندارى «دوستىق مولل»، «سيتي مولل»، «راحمەت»، «تايگا» ساۋدا ورتالىقتارىندا، «ايسبەرگ»، «وكەان»، «سەمەينىي»، «وت ي دو»، «سوكول»، «ەۋرازيا بازارى»، «التىن ارمان»، «ت د ك» ساۋدا ۇيلەرىندە جانە جامبىل، ينتەرناتسيونال، بۋكەتوۆ جانە نازاربايەۆ كوشەلەرىندە مونيتورينگ جۇرگىزۋدى جوسپارلاعان.
اۆتور
اقەركە داۋرەنبەك قىزى
