تۇركىستاندىق كولىك جۇرگىزۋشىنىڭ ايىپپۇلى 6,6 ميلليون تەڭگەگە جەتكەن
تۇركىستان وبلىسىندا جىلدامدىق رەجيمىن بۇزعان جۇرگىزۋشىنىڭ ايىپپۇلى 6 ميلليون تەڭگەدەن اسىپ كەتكەن، دەپ حابارلايدى قازاقپارات ءتىلشىسى.
ەسكى كولىك قالادا ەركىن جۇرگەن. ءتىپتى، جۇرگىزۋشى تراسساعا دا شىعىپ، قالاارالىق جولداردا كولىك تىزگىندەگەن. 6 ميلليون تەڭگەدەن استام ايىپپۇلى بولا تۇرا، جول ەرەجەلەرىن بۇزعان.
ءتارتىپ ساقشىلارى ايىپپۇلى كولىگىنەن قىمبات بولىپ كەتكەن جۇرگىزۋشىنى «شىمكەنت- سامارا» تاس جولىندا توقتاتتى. تەكسەرۋ ناتيجەسىندە جۇرگىزۋشىنىڭ اكىمشىلىك ايىپپۇلدارىنىڭ 80 پايىزى جىلدامدىق رەجيمىن بۇزۋمەن بايلانىستى ەكەنىن انىقتادى.
«تۇركىستان وبلىسىنىڭ پاترۋلدىك پوليتسيا باتالون قىزمەتكەرلەرىنىڭ پلانشەتتەرىنە «قورعاۋ- ءقاۋىپتى جۇرگىزۋشى» موبيلدىك باعدارلاماسى ارقىلى تولەنبەگەن ايىپپۇلدارى بار «فولكسۆاگەن پاسسات» ماركالى اۆتوكولىك تۋرالى اقپارات بەرىلدى. سوت ورىنداۋشىسىنىڭ قاۋلىسىنا سايكەس، ونىڭ جالپى سوماسى 6,6 ميلليون تەڭگە تولەنبەگەن ايىپپۇلى بولعان. ءتارتىپ ساقشىلارى كولىكتى ايىپتۇراققا قويىپ، جۇرگىزۋشىگە بەرەشەكتى ۋاقتىلى تولەۋ قاجەتتىگى تۋرالى ءتۇسىندىرۋ جۇمىستارىن جۇرگىزدى»، - دەدى تۇركىستان وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى باعلانبەك ايتپايەۆ.
