تۇركىستاندا حالىقتىڭ بىرلىگىن بەينەلەيتىن كيىز ءۇي تىگىلدى
تۇركىستاندا حالىقتىڭ بىرلىگىن بەينەلەيتىن كيىز ءۇي تىگىلدى، دەپ حابارلايدى Kazinform.
تۇركىستان قالاسىنداعى «ەتنواۋىل» كەشەنىندە قازاقستان حالقى اسسامبلەياسىنىڭ تاريحي- اعارتۋشىلىق «ءبىر ەل» جاستار جوباسى اياسىندا كيىز ءۇي تىگۋ ءىس- شاراسى ءوتتى.
يگى شارادا «قوعامدىق كەلىسىم» ر م م ديرەكتورىنىڭ ورىنباسارى نۇرلان شۋبايەۆ بارلىق ەتنوس وكىلدەرىنىڭ ءبىرتۇتاستىق پەن كەلىسىمدە ءبىر ورتانى مەكەن ەتۋى ەل ىرگەسىنىڭ بەرىكتىگىنە ىقپال ەتەتىنىن جەتكىزدى.
بۇل ءىس- شارا قازاقستان حالقىنىڭ بىرلىگىن، ۇيلەسىمدى ەتنوسارالىق قاتىناستاردى، تۋعان ەل، وتاندى بەينەلەيتىن قازاقتىڭ قاسيەتتى سيمۆولىنا قۇرمەت كورسەتۋ ماقساتىندا وتكىزىلدى. سونداي- اق ورتاق شاڭىراق استىندا ەلدىڭ بىرلىگىن، وتان يگىلىگى ءۇشىن قازاقستاندىقتاردىڭ بىرلەسكەن ەڭبەگىن، ءار ادامنىڭ ەلدىڭ دامۋىنا قوسقان ۇلەسى مەن اتسالىسۋىن بىلدىرەدى.
جيىندا ەل جاستارى كيىز ءۇيدىڭ ۋىعىن شانشىپ، شاڭىراعىن تىكتەپ، بيىككە كوتەردى. سونداي- اق ىزگى نيەتتەرىن ءبىلدىرىپ، اقساقالداردىڭ اق باتاسىن الدى. سالتىن ساقتاپ، ءداستۇرىن دارىپتەگەن ەتنوس وكىلدەرى قازاق جەرىن، اسىرەسە قاسيەتتى توپىراقتى قونىس ەتكەندەرىن قۋانىشپەن جەتكىزدى.
ايتا كەتەيىك، تۇركىستان قالاسىندا قر مادەنيەت جانە اقپارات مينيسترلىگىنىڭ قولداۋىمەن قازاقستان حالقى اسسامبلەياسىنىڭ تاريحي- اعارتۋشىلىق باعىتتاعى ء«بىر ەل» اتتى جاستارعا ارنالعان ءىس- شارا ءوتتى. جوباعا ەلىمىزدىڭ بارلىق وڭىرىنەن 100 گە جۋىق جاس كەلگەن.
