تۇركىستاندا 2,5 توننا ناۋرىز كوجە ءپىسىرىلدى
تۇركىستان. KAZINFORM - وڭىردە 2025 -جىلدىڭ تۋريستىك ماۋسىمى اشىلدى.
«تۇركىستان - تۇركى الەمىنىڭ رۋحاني استاناسى» تاقىرىبىمەن ءوڭىردىڭ تۋريستىك ماۋسىمى اشىلدى. وبلىستىڭ تۋريستىك الەۋەتىن، ينفراقۇرىلىمىن جاقسارتۋ جانە قوناقتارعا جوعارى دەڭگەيدە قىزمەت كورسەتۋ ماقساتىندا ۇيىمداستىرىلعان شارادا كورەرمەندەرگە ەرەكشە شوۋلار ۇسىنىلدى.
«Jana lep» شىعارماشىلىق ۇجىمى قازاقتىڭ ۇلتتىق اندەرىن ورىنداپ، كوپشىلىكتى ءسۇيسىندىردى. سونداي-اق زاماناۋي اۋەندەر شىرقالىپ، بالالار ۇلتتىق ويىنداردى وينادى.
تۋريستەر مەن تۇركىستاندىقتاردى تاڭعالدىرعان مەرەكەدە تاريحي تۇلعالار مەن كەيىپكەرلەر ەنگىزىلگەن كەرۋەن ءجۇرىپ ءوتتى.
تۋريستىك مەرەكەدە 2,5 توننا ناۋرىز كوجە ءپىسىرىلىپ، جۇرتشىلىققا ۇسىنىلدى. كوجە 150 تەڭگەدەن ساتىلدى. جينالعان بارلىق قاراجات بالالار ۇيىنە قايىرىمدىلىق رەتىندە بەرىلەدى بولادى. قوناقتار مەن تۇركىستاندىقتار ناۋرىزكوجەمەن اۋىز اشىپ، ءبىر- ءبىرىن مەرەكەمەن قۇتتىقتادى.
سيقىرشىلار قويىلىمى كورسەتىلىپ، بارابان شوۋى ۇيىمداستىرىلدى. تاماقتى جىلدام جەۋدەن جارىس ءوتىپ، قولونەرشىلەر شوۋلارى كورسەتىلدى.
ايتا كەتەيىك، بۇدان بۇرىن تۇركىستان «كينەس» رەكوردتار كىتابىنا ەنۋگە نيەتتى ەكەندىگىن جازعان بولاتىنبىز.
