تۇركىستانعا ەرەكشە مارتەبە بەرىلسە، قالادا جەر ءۇي سالۋعا شەكتەۋ كۇشەيتىلە مە
استانا. KAZINFORM - تۇركىستان وبلىسى اكىمىنىڭ ورىنباسارى بەيسەنباي تاجىبايەۆ تۇركىستان قالاسىنا زاڭمەن ەرەكشە مارتەبە بەرىلسە، شاھار اۋماعىندا جەر ءۇي سالۋدىڭ تالاپتارى قالاي وزگەرەتىنىن ايتتى.
- تۇركىستانعا ەرەكشە ستاتۋس بەرىلسە، جەر ءۇي سالۋ ءتارتىبى قالاي وزگەرەدى؟ شەكتەۋ كۇشەيمەي مە، - دەپ سۇرادى جۋرناليست ءماجىلىستىڭ جالپى وتىرىسىندا.
اكىمدىك وكىلى تاريحي ماڭىزى بار ەسكەرتكىشتەردىڭ ماڭايىنان باسقا اۋدانداردا ەشقانداي شەكتەۋ بولمايتىنىن ايتتى. تەك جەر ءۇي ينفراقۇرىلىمى دايىن اۋماققا سالىنۋى كەرەك.
- بۇل جەردە قالانىڭ ورتالىعىنداعى بەلگىلەنگەن نىسانداردا جەر ءۇي سالۋعا، ارينە، بولمايدى. بولسا دا، قالا اۋماعىندا جەر ءۇي سالۋعا ارنالعان تەلىمدەر بار، ينفراقۇرىلىم تارتىلعان. سول تەلىمدەردە ءۇي سالىپ، جۇمىستارىن جالعاستىرا الادى. تاريحي ەسكەرتكىشتەر اۋماعىندا تىيىم بار. تۇركىستان اۋماعىندا قوجا احمەت ياساۋي كەسەنەسىنەن بولەك 25 كە جۋىق ساقتاۋدى قاجەت ەتەتىن نىسان بار. ول توڭىرەكتەرگە ءۇي سالۋعا بولمايدى. تۋريستىك نىساندار اۋماعىندا شەكتەۋلەر ەنگىزىلگەن، - دەدى بەيسەنباي تاجىبايەۆ.
ايتا كەتەيىك، اتالعان قۇجات اياسىندا قوجا احمەت ياساۋي كەسەنەسىنەن 100 مەتر راديۋستا بيىك عيمارات سالۋعا زاڭمەن تىيىم سالىنباق.
سونداي-اق، اكىمدىك وكىلى دەپۋتاتتارعا تۇركىستان قالاسى نەگە اراقسىز قالاعا اينالماي جاتقانىن ءتۇسىندىردى.
