تۇركىستانعا كەلىن بولىپ تۇسكەن سۋدجين ليدىڭ ءومىرى كينوعا اينالدى
تۇركىستان. KAZINFORM - بۇگىن تۇركىستان قالاسىندا جاڭا فيلمنىڭ تۇساۋى كەسىلدى.
TURKISTAN تەلەارناسى وتكەن جىلى العاشقى كينوتۋىندىسىن تۇسىرگەن بولاتىن. كومەديالىق مەلودراما جانرىنداعى «كارىس كەلىن» فيلمى ومىردەگى شىنايى وقيعاعا نەگىزدەلگەن.
فيلمدە ساكەن ەسىمدى تۇلكىباستىق جىگىت پەن وڭتۇستىكك كورەيالىق سۋدجين لي ەسىمدى قىزدىڭ اراسىنداعى سىرلى سەزىمگە تولى حيكايا باياندالادى.
كورەيادا 5 جىل جۇمىس ىستەگەن ساكەن 2023 -جىلى سۋدجين ليدى قاراشاڭىراعىنا كەلىن ەتىپ تۇسىرگەن.
بۇگىندە جاس وتباسى تاتۋ-ءتاتتى ءومىر ءسۇرىپ جاتىر.
كينودا سۋدجين ليدىڭ قازاقستانعا كەلگەن العاشقى كۇندەردە باستان كەشكەن وقيعالارى سۋرەتتەلەدى.
سونداي- اق، تىرناقالدى تۋىندىدا ەكى جاستىڭ ماحابباتى ارقىلى وتباسى قۇندىلىقتارى، قازاقى داستۇرلەر كەڭىنەن ناسيحاتتالادى.
سونىمەن قاتار، جاڭارعان تۇركىستان قالاسى مەن تۇركىستان وبلىسىنىڭ تابيعاتى كورەرمەنگە جان جاقتى كورسەتىلەدى.
فيلم سسەناريىن تەلەارنا قىزمەتكەرلەرى بىرلەسە جازىپ شىققان. بۇل تۋىندى العاشقىدا تەلەسەريال رەتىندە تۇسىرىلگەن.
دەگەنمەن كورەرمەن تاراپىنان سۇرانىس بولعاندىقتان تولىق فورماتتى فيلم وڭدەلىپ، كينوتەاتردان دا كورسەتۋ جوسپارلانىپ وتىر.
باستى رولدەردى شىمكەنت قالاسى مەن تۇركىستان وبلىسىنىڭ كاسىبي اكتەرلەرى سومدايدى.
فيلم تۇركىستان قالاسى مەن تولەبي اۋدانىندا بار بولعانى 9 كۇندە تۇسىرىلگەن.
ايتا كەتەيىك، بۇعان دەيىن كورەيادان تۇلكىباسقا كەلىن بولىپ تۇسكەن سۋدجين لي باۋىرساق ءپىسىرىپ، ەت اسۋدى ۇيرەنىپ العانىن جازعان بولاتىنبىز.
اۆتور
قايرات زاينيشيەۆ
