تۇركىستانعا جاۋعان قاردى دەر كەزىندە ءتۇسىرىپ ۇلگەرمەسەڭ ەرىپ كەتەدى - قالا تۇرعىنى

ەرداۋلەت ساعىندىقتىڭ حوببيى سۋرەتكە ءتۇسىرۋ. بالا كۇنىنەن سۋرەت سالعاندى ۇناتاتىن ول، وسە كەلە كاسىبي فوتوگراف بولۋدى ارمانداعان. بۇل باعىتتا ارنايى فوتواپپاراتتا ساتىپ الىپتى. سودان كۇندەلىكتى كوزىنە تۇسكەن ادەمى كادرلاردى تاسپالاۋعا ادەتتەنگەن.

- كوبىنەسە تابيعاتتى تۇسىرگەندى ۇناتامىن. ەل ارالاپ، ەرەكشە جاعدايلاردى كەزىكتىرسەم دەيمىن. ەلىمىزدەگى اۋىل ايماقتاردى سۋرەتكە تۇسىرگىم كەلەدى، - دەيدى ول.

ەرداۋلەت تۇركىستان قالاسىندا دۇنيەگە كەلگەن. وسىندا ءبىلىم الىپ، ەڭبەك ەتىپ كەلەدى. قالانىڭ ءاربىر تاريحي ساتتەرىن قالت جىبەرمەيدى. سۋرەتكە ءتۇسىرىپ، ارحيۆىنە ساقتاپ قويادى.

- تۇركىستان قالاسىنىڭ كوشەلەرىن، كەسەنە اۋماعىن ءجيى سۋرەتكە ءتۇسىرىپ الامىن. سەبەبى، قالا وبلىس ورتالىعى اتانعان ساتتەن باستاپ قاتتى وزگەرە باستادى. مەندە قازىر بۇرىڭعى ەسكى كوشەلەر مەن عيماراتتاردىڭ سۋرەتتەرى ساقتالىپ تۇر. الداعى ۋاقىتتا بارلىعىن جيناقتاپ فوتوكورمە وتكىزۋدى جوسپارلاپ وتىرمىن، - دەيدى ەرداۋلەت.

تۇركىستاندىق تۇرعىن #Qazalemi حەشتەگىمەن جاريالانعان بايقاۋ تۋرالى whatsapp جەلىسىنەن بىلگەن. سودان بىردەن Instagram پاراقشاسىنا ءوزى تۇسىرگەن سۋرەتتەردى ىزدەپ تاۋىپ، جۇكتەگەن.

- جالپى تۇركىستاندا قاردى كەزدەستىرۋ قيىن. جاۋعان كۇنى سۋرەتكە ءتۇسىرىپ ۇلگەرمەسەڭ، 2-3 ساعات ىشىندە ەرىپ كەتەدى. بايقاۋ باستالاردان ەكى كۇن الدىن تۇركىستانعا قار جاۋدى. سودان، وزىمە ۇنايتىن سۋرەتتەردى ءتۇسىرىپ العان بولاتىنمىن. كەيىن بايقاۋ تۋرالى ەستىگەندە بىردەن ءارحيۆىمدى اقتاردىم، - دەيدى ەرداۋلەت سەرىك ۇلى.

ايتا كەتەيىك، بۇعان دەيىن تانىمال اكتەر ءارى پروديۋسەر نۇرلان قويانبايەۆ Instagram جەلىسىندەگى پاراقشاسىندا قازاقستاننىڭ تاۋەلسىزدىك كۇنىنە وراي بايقاۋ ۇيىمداستىرعان بولاتىن.

قاتىسۋشىلار ءوز ايماعىنداعى قىس كەلبەتىن جانە قىسقى، كورىكتى جەرلەردى سۋرەت پەن ۆيدەوعا ءتۇسىرىپ، #Qazalemi حەشتەگىمەن الەۋمەتتىك جەلىگە جۇكتەۋى قاجەت.

ەڭ كرەاتيۆتى جۇمىستاردىڭ اۆتورلارىنا سىيلىقتار - جاڭا سمارتفوندار مەن شيپاجايعا جولداما بەرىلەدى. بايقاۋ قورىتىندىسى 27 -جەلتوقساندا جاريالانادى.

ايتا كەتەيىك، بۇدان بۇرىن تۋعان جەردىڭ تابيعاتىن الەۋمەتتىك جەلى ارقىلى تانىتىپ جۇرگەن تولەبي اۋلانىنىڭ تۇرعىنى جايىندا جازعان بولاتىنبىز.

كەيىننەن كەنتاۋلىق تۇرعىن قالانىڭ قىسقى كورىنىسى بەينەلەنگەن سۋرەتتەر جاريالادى.

قايرات زاينيشيەۆ

اۆتور

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى