تۇركىستان وبلىسىندا وقۋشى ءموبيلدى قوسىمشا مەن قازاقشا سويلەيتىن روبوت قۇراستىردى
تۇركىستان. KAZINFORM - سارىعاش اۋدانىندا 10-سىنىپ وقۋشىسى JARIQ جاساندى ينتەللەكت ءموبيلدى قوسىمشاسىن جاساپ، تابىسقا قول جەتكىزە باستادى.
«وتىرار» ارناسىنىڭ جازۋىنشا، 10-سىنىپ وقۋشىسى جانسەرىك كامال جاساعان باعدارلاما دىبىستىق حابارلامانى 100 دەن اسا تىلدە جازباشا ماتىنگە اينالدىرا الادى. سونىمەن قاتار، ساۋالدارعا جاۋاپ بەرەدى. ءجاسوسپىرىم تىڭ جوباسىمەن رەسپۋبليكالىق بايقاۋدا توپ جاردى. جاس عالىم ويلاپ تاپقان موبيلدىك قوسىمشانى بۇگىندە Google Play Market-تەن جۇكتەپ، 150 گە تارتا ادام قولدانۋدا.
«قازىر „جارىقتى“ كوپتەگەن ادام قولدانادى. بۇل قوسىمشانىڭ نەگىزگى ماقساتى — ادامداردىڭ ۋاقىتىن ۇنەمدەۋ. مەنىڭ باقىلاۋىم بويىنشا مۇنى كوپ وقۋشىلار پايدالانادى. كۇندەلىكتى ومىردە قوسىمشا اقپاراتتار، كىتاپتار ىزدەۋ بارىسىندا پايدالاناتىنىن باقىلاپ وتىرامىن. مەندە تولىق ستاتيستيكاسى بار. ەگەر وقۋعا ەرىنسەڭىز، قىسقاشا مالىمەت تە ۇسىنادى»، - دەيدى سارىاعاش اۋدانى № 4 مامانداندىرىلعان «دارىن» مەكتەپ- ينتەرناتىنىڭ 10-سىنىپ وقۋشىسى جانسەرىك كامال.
موبيلدى قوسىمشا وقۋشىنىڭ العاشقى جوباسى ەمەس. جانسەرىك دەمالىس ورىندارىنا كەلگەن قوناقتارعا سۋسىن جەتكىزۋشى «قولقانات» روبوتىنىڭ ماكەتىن جاساپ شىعارعان. اقىلدى روبوت اپپاراتتىق جانە باعدارلامالىق جاساقتامادان تۇراتىن ارنايى پلاتفورما ارقىلى جاسالعان. ول دىبىس جازاتىن سايت ارقىلى قازاق تىلىندە سويلەي الادى.
«بۇل روبوتتىڭ ەرەكشەلىگى - قوناق ءۇي، مەيرامحانالاردا كەلگەن ادامدارعا سۋسىن ۇسىنىپ، ولارمەن سويلەسىپ، كوڭىل- كۇيىن كوتەرۋگە قوسىمشا ءبىر ەلەمەنت رەتىندە قاراستىرىلادى. سونىمەن قاتار، شەتەلدىك تۋريستەرگە قازاقستان تۋرالى جاعىمدى ەموتسيا قالدىرادى دەپ سانايمىن»، - دەدى جاس عالىم.
دارىندى ءجاسوسپىرىم وتكەن جىلى «سارىاعاش تۋريزم» قوسىمشاسىن ىسكە قوستى. كۋرورتتىق ايماق تۋرالى تولىققاندى اقپارات ۇسىناتىن قوسىمشانى بۇگىندە 300 دەن اسا ادام قولدانادى. رەسپۋبليكالىق كونكۋرستا جۇلدەلى ورىن يەلەنگەن جوباعا قىزىعۋشىلىق تانىتقاندار دا جوق ەمەس.
15 جاستاعى سارىاعاشتىق جاس عالىم قازىر ءوزى سىندى وقۋشىلارعا ينتەلەكتۋالدى ويىن جاساۋدى قولعا العان. جانسەرىكتىڭ الداعى ماقساتى — عىلىم مەن تەحنيكانىڭ تىلسىم تۇستارىن بارىنشا تەرەڭ مەڭگەرۋ. وقۋشىنىڭ بۇل باعىتتا العا قويعان ماقساتتارى دا تولاعاي.
