تۇركىستان وبلىسىندا تۇيە كوتەرەتىن بالۋان تۇرادى
تۇركىستان. KAZINFORM - ول 400 كەلىگە جۋىق زاتتى يىعىنا سالىپ الىپ، ەركىن وتىرىپ-تۇرادى.
سايرام اۋدانىنا قاراستى ويماۋىت اۋىلىنىڭ تۇرعىنى ءبىرجان ساعادات ۇلىن جەرلەستەرى «بورتە» دەپ اتايدى. بۇل - ونىڭ كوكپارعا دەگەن قىزىعۋشىلىعىنا بەرىلگەن ەسىم. سونداي-اق كۇش اتاسى قاجىمۇقاننىڭ ءىزباسارى سانايتىندار دا بار. سەبەبى ءبىرجان جاس بولسا دا الىپ كۇشكە يە. كولىك سۇيرەپ، قوشقار كوتەرەدى. ءتىپتى، 350-380 كەلىلىك تۇيەنى يىعىنا سالىپ، قينالماي العا قاراي قادامدايدى.
- ارنايى جاتتىعۋ جاساپ دايىندالعان جوقپىن. سپورت زالعا بارىپ، شىنىققان ەمەسپىن. بويىمدا اللانىڭ بەرگەن كۇشى بار. بىردەن اۋىر دا، الىپ زاتتاردى كوتەرىپ كەتە بەرەمىن، - دەيدى ول.
جاس جىگىت الىپ كۇشكە يە بولۋ قاسيەتىن اتاسى جاقىپبەكتەن دارىعان دەپ بىلەدى. ول دا جىگىت شاعىندا كۇشتىلىگىمەن تالايدى تامساندىرعان. كولىكتىڭ ماتورىن ءبىر ءوزى كوتەرىپ العان ساتتەرىنە كۋا بولعان جەرلەستەرى كوپ. ءبىرجان سول اتاسىنا قاراپ ءوستى. ءتالىمى مەن تاربيەسىن الدى. بالا كەزىندە قوزى، لاقتى ەركىن كوتەرەتىن بولعان. بەرتىن كەلە، قوي، قوشقاردى يىعىنا سالىپ، جۇرە بەرەتىن كۇشكە يە بولدى. قازىر تۇيە كوتەرەتىن پالۋان اتانىپ وتىر.
الەۋمەتتىك جەلىدە ءبىرجاننىڭ بىرنەشە ۆيدەوسى كوپشىلىككە كەڭىنەن تاراپ كەتتى. وندا الىپ كۇش يەسى ەسەكتىڭ ۇستىندە وتىرعان بالانى ەركىن كوتەرىپ الادى. جەڭىل كولىكتىڭ استىنان ۇستاپ، جىلجىتادى. تۇيەنى يىعىنا سالىپ الىپ، ادىمداپ جۇرەدى. ۇلكەن تاستى كەۋدەسىنە قىسىپ الىپ، جۇگىرەدى. جەلىدە جاريالانعان بۇل ۆيدەولار، وقىرمانداردىڭ قىزىعۋشىلىعىن تۋدىردى. سوندىقتان جاقسى پىكىرلەر جازىپ، ساتتىلىك تىلەگەن جاندار كوپ.
- الىپتار سايىسىنان ارنايى جۇلدەگە يە بولدىم. الداعى ۋاقىتتا دا ءتۇرلى باسەكەلەرگە قاتىسىپ قازاق ەلىنىڭ تۋىن كوككە كوتەرسەم دەيمىن. وسى ماقساتتا استاناعا بارىپ، اۋىر اتلەتيكامەن شۇعىلدانۋدى ويلاپ ءجۇرمىن. جالپى، قولداۋ بولسا تۇبەگەيلى سپورتقا اۋىسۋعا بولادى، - دەيدى بالۋان.
ءبىرجاننىڭ بويى 1,83 مەتر، ال سالماعى 110 كەلىگە جۋىق. پالۋان تاماق تالعامايدى. اسىرەسە، ەت، نان سالما سەكىلدى استى ءسۇيسىنىپ جەيدى. «كۇشتى بولۋ ءۇشىن، كوپ تاماق ءىشۋ كەرەك» دەپ بىلەدى. ال حوببيى - كوكپار.
- قىزۋقاندى قازاقپىز عوي. ات دەسە دەلەبەمىز قوزىپ تۇرادى. اتقا ءمىنىپ، كوكپار شابۋعا قىزىعامىن. تۇركىستان وبلىسى مەن شىمكەنت قالاسىنىڭ اتىنان شىعىپ، كوپتەگەن جۇلدەگە يە بولدىق. ءوزىم دە ۇيدە جىلقى ۇستايمىن. «اقىلتەكە» اتتى پارودالىق جىلقىم بار. ءبىراق ول كوكپار شابۋعا جارامايدى، - دەيدى بالۋان.
ءبىرجان قۋانىش 2000-جىلى دۇنيەگە كەلگەن. ويماۋىت اۋىلىنداعى تولە ءبي اتىنداعى مەكتەپتە ساۋات اشىپ، 11 جىل بويى ءبىلىم الدى. سودان اگرارلىق كوللەدجدە وقىپ، ۆەتەرينار ماماندىعىن مەڭگەردى. بۇگىندە 25 جاستاعى جاس جىگىت اۋىلدا مال دارىگەرى بولىپ قىزمەت اتقارىپ كەلەدى.
- بالا كۇنىمىزدە ارمان كوپ بولدى گوي. دەگەنمەن ءومىر اعىسى باسقا ارناعا بۇرىپ اكەتتى. قازىر ءوز ماماندىعىمدى قاتتى جاقسى كورەمىن. حالىققا قىزمەت ەتىپ، جەرلەستەرىمنىڭ العىسىنا بولەنىپ ءجۇرمىن، - دەيدى ول.
ايتا كەتەيىك، بۇدان بۇرىن تۇركىستاندا جاستار مۇقتاج وتباسىلارعا جىل سايىن ءۇي سالىپ بەرەتىنىن جازعان بولاتىنبىز.
