تۇركىستان وبلىسىندا تولاسسىز جاۋعان جاڭبىردان وزەن-كولدەردە سۋ دەڭگەيى كوتەرىلىپ جاتىر
تۇركىستان. KAZINFORM - تۇركىستان وبلىسى توتەنشە جاعدايلار دەپارتامەنتىندە جەدەل شتاب قۇرىلدى.
وڭىردە كۇننىڭ كۇرت جىلىنىپ، بىرنەشە كۇننەن بەرى تولاسسىز جاۋعان جاۋىن سالدارىنان وزەن-كولدەردە سۋ دەڭگەيى كوتەرىلىپ جاتىر. وسىعان وراي كوكتەمگى سۋ تاسقىنىنىڭ الدىن الۋ شارالارى كۇشەيتىلدى.
وبلىس اكىمى دارحان ساتىبالدى ساۋران اۋدانىنداعى سۋ باسۋ قاۋپى باسىم ايماقتاردى ارالاپ، جاۋاپتى سالا باسشىلارىنا ناقتى تاپسىرما بەردى. سىرداريا وزەنىنىڭ اعىسىنداعى ەلدى مەكەندەردىڭ تۇرعىندارىمەن جۇزدەستى.
تۇركىستان وبلىسى توتەنشە جاعدايلار دەپارتامەنتىندە جەدەل شتاب قۇرىلدى. ۇيلەردى سۋ باسۋعا جول بەرمەۋ ماقساتىندا تجد مەن جەرگىلىكتى اتقارۋشى ورگانداردىڭ كۇشتەرى جاڭبىر سۋىن سورۋ جۇمىستارىن جالعاستىرىپ جاتىر. جولىنداعى جايپاپ وتەتىن «قىزىل سۋدان» قورعانۋ ءۇشىن بوگەتتەر قويىلىپ، سۋ ارنالارى ءقاۋىپسىز ايماققا اۋىستىرىلعان. قۇرال- جابدىقتار مەن ينەرتتى ماتەريالدار رەتكە كەلتىرىلدى.
«مامان دا، ارنايى تەحنيكا دا جەتكىلىكتى. جاعداي تۇراقتى بولعاندىقتان قاۋىپتى ۋچاسكەلەر جاۋاپتى قىزمەتكەرلەر مەن قۇزىرەتتى ورگانداردىڭ ءجىتى باقىلاۋىندا. تاسقىن كەزىندە حالىقتى شۇعىل ەۆاكۋاتسيالاۋعا ارنالعان ورىن دايىن. ماماندار وبلىستىڭ بارلىق ايماعىندا ناۋرىز ايىندا تۇسەتىن جاۋىن- شاشىن كولەمى نورمادان جوعارى بولادى دەپ ەسكەرتەدى»، - دەلىنگەن تۇركىستان وبلىسى اكىمدىگى تاراتقان اقپاراتتا.
