تۇركىستان وبلىسىندا قىزعالداق جۇلعان تۇرعىنعا قاتىستى قىلمىستىق ءىس قوزعالدى
تۇركىستان. KAZINFORM- قازىر القاپتارعا ەسكەرتۋ تاقتايشالارى ورناتىلىپ جاتىر.
ورداباسى اۋدانى ۇيالىجار اۋىلدىق وكرۋگىندەگى القاپتا قىزىل كىتاپقا ەنگەن قىزعالداقتاردى جۇلعان شىمكەنت قالاسىنىڭ تۇرعىنى ۇستالدى.
اتالعان جايت بويىنشا ق ك- نىڭ 339-بابى «وسىمدىكتەردىڭ سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق پايدالانۋعا تىيىم سالىنعان تۇرلەرىن جويۋ» بويىنشا قىلمىستىق ءىس قوزعالدى.
بارلىق ءمان-جايلاردى انىقتاۋعا باعىتتالعان تەرگەۋ جۇرگىزىلەدى، ونىڭ ناتيجەلەرى بويىنشا زاڭدى شەشىم قابىلدانادى.
- پوليتسيا تابيعاتتى قورعاۋ زاڭناماسىنىڭ بۇزىلۋىن انىقتاۋ ءۇشىن رەيدتەر مەن الەۋمەتتىك جەلىلەرگە مونيتورينگ جۇرگىزىپ جاتىر. سونداي-اق القاپتارعا ەسكەرتۋ تاقتايشالارى ورناتىلىپ، ءتۇسىندىرۋ جۇمىستارى ىستەلىپ جاتىر. ءتارتىپ ساقشىلارى قىزىل كىتاپقا ەنگەن وسىمدىكتەردى جۇلعانى ءۇشىن زاڭعا سايكەس جاۋاپكەرشىلىك قاراستىرىلعانىن ەسكە سالادى، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتتا.
ايتا كەتەيىك، بۇدان بۇرىن شىمكەنتتە انتيكور ءتوراعاسىنىڭ بۇرىنعى ورىنباسارى 11 جىلعا سوتتالعانىن جازعان بولاتىنبىز.
