تۇركىستان قالاسىنىڭ 32 پايىزى عانا كارىز جۇيەسىنە قوسىلعان
تۇركىستان قالاسىنىڭ 32 پايىزى عانا كارىز جۇيەسىنە قوسىلعان. بۇل تۋرالى تۇركىستان قالاسىنىڭ اكىمى نۇربول تۇراشبەكوۆ مالىمدەدى، دەپ حابارلايدى Kazinform.
وبلىس ورتالىعى تۇركىستان قالاسىندا ورتالىقتاندىرىلعان كارىز جۇيەسىنە 13601 ابونەنت قانا قوسىلعان.
بۇل - جالپى قالانىڭ 32,2 پايىزى.
سارقىندى سۋ تازالاۋ عيماراتىندا بيوتازالاۋ جۇيەسى تولىق جۇمىس اتقارۋ ءۇشىن تاۋلىگىنە كەمىندە 10 مىڭ تەكشە كارىز سۋى كەلۋى كەرەك.
قالا اۋماعى كۆارتال ىشىلىك ابونەنتتىك جەلىمەن قامتاماسىز ەتىلمەگەندىكتەن بۇل ازىرشە مۇمكىن بولماي وتىر.
سەبەبى جۇرگىزىلگەن سارقىندى سۋ جەلىلەرىنىڭ باسىم بولىگى - ماگيسترالدى قۇبىرلار.
وسىعان وراي قالا كولەمىن سارقىندى سۋ جۇيەسىمەن جانە ابونەنتتىك قوسىلىمدارمەن قامتاماسىز ەتۋ ماقساتىندا تۇركىستاندا 14 جوبانى جۇزەگە اسىرۋ قاجەت.
«قازىرگى تاڭدا 7 نىساننىڭ قۇرىلىسى ءجۇرىپ جاتىر. ءۇش نىسان 2023 -جىلى پايدالانۋعا تاپسىرىلادى. بيىل تورتەۋىنىڭ قۇرىلىسى باستالدى. 2023 -جىلدىڭ سوڭىنا دەيىن سارقىندى سۋ جەلىسىمەن قامتاماسىز ەتۋ كورسەتكىشىن 36,3 پايىزعا جەتكىزۋ جوسپارىمىزدا بار. سونىمەن قاتار، 3 نىسان رەسپۋبليكالىق بيۋدجەتكە قارجىلاندىرۋعا ۇسىنىلدى. اتالعان جوبالار تولىقتاي ىسكە قوسىلعان جاعدايدا 2025 -جىلعا قاراي قالا اۋماعىن كارىز جۇيەسىمەن قامتۋ كورسەتكىشى 95 پايىزعا جەتەدى»، - دەدى قالا اكىمى نۇربول تۇراشبەكوۆ.
