تۇركيانى ءدۇر سىلكىندىرگەن قىلمىس: «جاڭا تۋعان نارەستەلەر» ارقىلى پايداعا كەنەلمەك بولعان
ىستانبۇل. KAZINFORM - تۇركيادا «سابيلەرگە» قاتىستى جانجال شىقتى. اتالمىش قىلمىسقا 47 ادامنان قۇرالعان توپ اراسىندا دارىگەرلەر، مەدبيكەلەر مەن اۋرۋحانانىڭ وزگە دە قىزمەتكەرلەرىنىڭ قاتىسى بار بولۋى مۇمكىن. ۇيىمداسقان قىلمىستىق توپ مۇشەلەرىنە اۋىر ناۋقاسقا شالدىققان جاڭا تۋعان نارەستەلەر ارقىلى قارجىلاي پايدا تابۋ ماقساتىندا جەكەمەنشىك ەمدەۋ مەكەمەلەرىنە زاڭسىز جونەلتىپ وتىرعان دەگەن ايىپ تاعىلىپ وتىر، دەپ حابارلايدى Kazinform-نىڭ مەنشىكتى ءتىلشىسى.
تەرگەۋ امالدارى كوپتەگەن ارىز- شاعىمداردان كەيىن باستالعان. كۇدىكتىلەر تۇركيانىڭ مەملەكەتتىك الەۋمەتتىك ساقتاندىرۋ جۇيەسىنەن (SGK) تولەمدەر الۋ ءۇشىن شوتتاردى نەگىزسىز ءوسىرىپ، ناۋقاس بالالاردى اۋرۋحانالاردا مەيىلىنشە ۇزاق جاتقىزۋعا تىرىسقان.
تەرگەۋ انىقتاعانداي، جاڭا تۋعان نارەستەلەر اۋىستىرىلعان جەكەمەنشىك اۋرۋحانالاردا مەديتسينالىق كومەك كورسەتۋگە وڭتايلى جاعداي بولماعاندىقتان، كەمىندە 10 نارەستە قايتىس بولعان.
باندانىڭ جەتەكشىسى رەتىندە تۇركيانىڭ جەدەل جاردەم جەلىسى ارقىلى جاڭا تۋعان نارەستەلەردى جەكە اۋرۋحانالارعا جىبەرۋدى ۇيلەستىرگەن دوكتور فيرات سارى دەپ تانىلعان.
تەرگەۋ بارىسىندا جان تۇرشىگەرلىك جايتتار، سونىڭ ىشىندە قىلمىستىق توپ مۇشەلەرىنىڭ سابيلەردىڭ تاعدىرىن بەيقامدىقپەن تالقىلاعان اڭگىمەلەرىنىڭ جازبالارى انىقتالعان. كەيبىر دارىگەرلەر مەن مەدبيكەلەر كومەك كورسەتۋگە قاساقانا سالعىرتتىق تانىتىپ، جاڭا تۋعان نارەستەلەردىڭ جاعدايىن اۋىرلاتىپ، ءتىپتى ولىمگە اكەلىپ سوقتىرعان دەرەكتەر انىقتالىپ وتىر.
قازىرگى ۋاقىتتا 22 ادام قاماۋعا الىنىپ، وسى ىسكە قاتىسى بار جەكە كلينيكالاردىڭ جۇمىس ىستەۋ ليتسەنزياسى توقتاتىلدى. تۇرىك ۇكىمەتى، ونىڭ ىشىندە ەلدىڭ دەنساۋلىق ساقتاۋ مينيسترلىگى اۋقىمدى تەكسەرۋلەرگە كىرىسىپ، بارلىق كىنالىلەردى جازالاۋ ءۇشىن ءىستى اياعىنا دەيىن جەتكىزۋگە ۋادە بەردى.
