تۇركياداعى نارازىلىقتىڭ سايابىرسيتىن ءتۇرى جوق

19 -ناۋرىز كۇنى وپپوزيتسيالىق مەردىڭ تۇتقىنعا الىنۋى نارازىلىق وتىنىڭ تۇتانىپ، ليرا قۇنىنىڭ قۇلدىراۋىنا الىپ كەلدى. بيلىك تاراپىنان قولعا الىنعان تىيىم شارالارىنا قاراماستان جۇما كۇنى كەشكىسىن ەلدىڭ ءىرى قارالارىندا شەرۋ ءوتتى. ىستانبۇلدا 300 مىڭعا جۋىق ادام قالا اكىمشىلىگى عيماراتىنىڭ الدىنا جينالدى. رەسپۋبليكالىق حالىق پارتياسىنىڭ كوشباسشىسى وزگيۋر وزەل جينالعان حالىق الدىندا ءسوز سويلەدى. الايدا، پوليتسيا جينالعاندارعا قارسى سۋ جانە گاز شاشاتىن قۇرىلعىلاردى قولداندى.

وپپوزيتسيا يماموگۋلدىڭ تۇتقىندالۋىندا ساياسي استار بار دەپ سانايدى. ويتكەنى، ول 2028 -جىلى تۇركيادا وتەتىن پرەزيدەنتتىك سايلاۋدا ەردوعاننىڭ باستى قارسىلاسى بولىپ وتىر.

يماموگلۋمەن بىرگە 100-گە جۋىق ادام تۇتقىنعا الىندى. بيلىك ەلدىڭ ءبىرقاتار قالاسىندا شەرۋگە شىعۋعا تىيىم سالدى. الايدا، وسىعان قاراماستان وزگيۋر وزەل ادامداردى كوشەگە شىعۋعا شاقىرۋدا.

ساراپشىلار يماموگلۋعا تۇركيادا، ەو مەن ونىڭ باتىستىق وداقتاستارىندا لاڭكەستىك ۇيىمدار تىزىمىنە ەنگىزىلگەن كۇردىستان جۇمىسشىلار پارتياسىمەن بايلانىسى تۋرالى رەسمي ايىپ تاعىلعان جاعدايدا قىزمەتىنەن الىنادى دەپ سانايدى. ال ونىڭ لاۋزىمىن «قامقورشىلىق مەر» باسۋى مۇمكىن.

بۇعان دەيىن تۇركيا پرەزيدەنتى رەجەپ تايىپ ەردوعاننىڭ باستى ساياسي قارسىلاسى ىستانبۇل قالاسىنىڭ مەرى ەكرەم يماموگلۋ مەن ونىڭ باسپا ءسوز كەڭەسشىسى مۇرات ونگۋن ارنايى وپەراتسيا كەزىندە تۇتقىندالىپ، سوتقا بەرىلگەنىن جازعان ەدىك.

مۇنان بولەك، ەلدەگى ىشكى ساياساتتا نە بولىپ جاتقانىنا قاتىستى ماتەريال ۇسىنعان بولاتىنبىز.

تۇركيانىڭ ىشكى ساياساتىنداعى تۇراقسىزدىق ورتالىق بانككە قوسىمشا قيىندىقتار تۋدىرىپ، ەل ەكونوميكاسىنا ايتارلىقتاي كەرى اسەرىن تيگىزىپ جاتقانى تۋرالى دا جازدىق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى