تۇركيادا تىكۇشاق اۋرۋحانا عيماراتىنا سوقتىعىستى

مۋگلا قالاسى مەنتەشە اۋدانىندا ورنالاسقان مۋگلا وقۋ-زەرتتەۋ اۋرۋحاناسىنان ۇشىپ شىققان تىكۇشاق انتالياعا قاراي باعىت العان. الايدا ۇشۋ بارىسىندا اۋرۋحانانىڭ ءتورتىنشى قاباتىنا سوقتىعىسىپ، جەرگە قۇلاعان.

اپات تۋرالى حابارلاما تاراعاننان كەيىن وقيعا ورنىنا كوپتەگەن ءورت ءسوندىرۋشى، مەديتسينا قىزمەتكەرى، پوليتسيا جانە قۇتقارۋشىلار باردى.

مۋگلا گۋبەرناتورى يدريس اكبيك بىردەن قايعىلى وقيعا بولعان جەرگە بارىپ، جۋرناليستەرگە تۇسىنىكتەمە بەردى. ونىڭ سوزىنشە، اپات سالدارىنان تىكۇشاقتا بولعان ەكى ۇشقىش، ءبىر دارىگەر جانە جەدەل جاردەم قىزمەتكەرى قازا تاپقان.

اكبيك اتاپ وتكەندەي، اۋداندى بۇگىن قالىڭ تۇمان باسقان. قازىر اپات سەبەپتەرى انىقتالىپ جاتىر. ول اۋرۋحانا قيراماعانىن ايتتى.

وسى اپاتقا بايلانىستى قىلمىستىق ءىس قوزعالدى.

ال ەلدىڭ دەنساۋلىق ساقتاۋ ءمينيسترى الەۋمەتتىك جەلىدە وقيعاعا قاتىستى پىكىر ءبىلدىرىپ، قازا بولعانداردىڭ وتباسىلارىنا كوڭىل ايتتى.

— ءبىزدىڭ مينيسترلىكتىڭ قاراماعىنداعى جەدەل جاردەم تىكۇشاعى مۋگلا وقۋ-زەرتتەۋ اۋرۋحاناسىنا سوقتىعىسىپ، جەرگە قۇلادى. اپات سالدارىنان ءبىزدىڭ ءتورت ارىپتەسىمىز، ونىڭ ىشىندە ەكى ۇشقىش، ءبىر دارىگەر جانە مەديتسينا قىزمەتكەرى قازا تاپتى. ءبىز ولاردىڭ وتباسىنا كوڭىل ايتامىز. وقيعانى تەرگەۋ جالعاسۋدا، ءتيىستى اقپارات جاريا ەتىلەدى، — دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى