تۇركيادا تۇنگى كلۋبقا بارعان: مەكتەپ مۇعالىمدەرى ديرەكتورىن سوتقا بەرىپ، شەشىم شىقتى
قىزىلوردا. KAZINFORM - قىزىلوردا وبلىسى قارماقشى اۋداندىق سوتى تۇركيادا تۇنگى كلۋبقا بارىپ، جۇمىسىنان شىعىپ قالعان ەكى مۇعالىمنىڭ مەكتەپ ديرەكتورىنىڭ ۇستىنەن بەرگەن تالاپ ارىزىن قاناعاتتاندىرۋدان باس تارتتى.
قارماقشى اۋداندىق سوتىندا تالاپ قويۋشىلار س. مەن ج. -نىڭ جاۋاپكەرلەر م مەن ج- دان، اۋداندىق پوليتسيا بولىمىنەن مورالدىق زيان ءوندىرۋ تۋرالى ازاماتتىق ءىسى قارالدى.
«مەكتەپ-ليتسەي مۇعالىمدەرى 2024-جىلعى 9-قاڭتاردان ءوز وتىنىشتەرىنە بايلانىستى جۇمىستان بوساتىلعان. تالاپ قويۋشىلار سوتقا جاۋاپكەرلەردىڭ ءىس-ارەكەتى سالدارىنان مورالدىق زيان شەككەندىگىن كورسەتكەن. سول سەبەپتى ءارقايسىسىنىڭ پايداسىنا م مەن ج. -نىڭ اربىرىنەن 3 ميلليون تەڭگەدەن، قارماقشى اۋدانىنىڭ پوليتسيا بولىمىنەن 5 ميلليون تەڭگەدەن جانە جاۋاپكەرلەردەن ورتاقتاسقان تۇردە 1 ميلليون تەڭگەدەن زاڭگەرگە كەتكەن شىعىندى ءوندىرۋدى سۇراعان. ءىس-قۇجاتتارىنا جانە سوتتا زەرتتەلگەن ءمان-جايلارعا قاراعاندا ناق وسى جاۋاپكەرلەردىڭ ىس-ارەكەتىنەن (ارەكەتسىزدىكتەن) تالاپ قويۋشىلارعا قانداي دا ءبىر زيان كەلگەنى انىقتالعان جوق. تالاپ قويۋشىلار ءوز وتىنىشتەرىنە بايلانىستى جۇمىستان بوساتىلعان»، - دەپ ءمالىم ەتتى قارماقشى اۋداندىق سوتىنان.
مەكتەپ باسشىلىعىنىڭ قىسىمىنان جانە باسقا جاۋاپكەرلەردىڭ ارەكەتىنەن وزدەرىنە زيان كەلگەنىن راستايتىن دالەلدەمەنى سوتقا ۇسىنا الماعان.
«قارماقشى اۋداندىق سوتىنىڭ شەشىمىمەن تالاپ قويۋشىلاردىڭ مورالدىق زيان ءوندىرۋ تۋرالى تالاپ قويۋ قاناعاتتاندىرۋدان باس تارتىلدى. سوت شەشىمى زاڭدى كۇشىنە ەنبەگەن. شەشىممەن كەلىسپەگەن تاراپ، جوعارى تۇرعان ساتى سوتىنا شاعىم كەلتىرە الادى»، - دەپ تولىقتىردى قارماقشى اۋداندىق سوتى.
