تۇركيادا رەجەپ ەردوعاننىڭ قاتىسۋىمەن پالەستينانى قولداۋ ميتينگى وتۋدە
ىستانبۇلدا بىرنەشە جىل بۇرىن جابىلعان اتاتۇرىك اۋەجايى اۋماعىندا كوپتەگەن ادامنىڭ قاتىسۋىمەن پالەستينانى قولداۋعا باعىتتالعان سانكتسيالانعان اۋقىمدى ميتينگ وتۋدە، دەپ حابارلايدى Kazinform ءتىلشىسى.
بۇعان دەيىن تۇركيا پرەزيدەنتى رەجەپ تايپ ەردوعان ەلدىڭ بارلىق ازاماتتارىن پالەستينانى قولداۋ ميتينگىنە قاتىسۋعا شاقىرعان بولاتىن.
«ۇلتىمىزدىڭ ءاربىر وكىلىن بۇكىل الەمگە پالەستينالىق باۋىرلارىمىزبەن ىنتىماقتاستىقتى كورسەتۋ ءۇشىن «ۇلكەن پالەستينا ميتينگىنە» شاقىرامىن»، - دەدى ر. ەردوعان.
سونىمەن قاتار تۇركيا بىرنەشە ەلدەردىڭ باسشىلارىن پالەستينانى قولداۋ ميتينگىسىنە شاقىرعان. بۇل اكتسياعا ساۋد ارابياسى، مىسىر، ليۆيا، ليۆان جانە يوردانيا باسشىلارى شاقىرىلعانى ايتىلۋدا.
ەل بيلىگى ۇيىمداستىرعان يزرايلدىڭ گازا سەكتورىنداعى ارەكەتتەرىنە قارسى مانيفەسكە تۇركيانىڭ جوعارى لاۋازىمدى تۇلعالارى، شەنەۋنىكتەرى مەن ءىرى كاسىپكەرلەرى قاتىسىپ جاتىر.
رەجەپ تايپ ەردوعان جۇبايى ەمينە ەردوعانمەن بىرگە ونداعان مىڭ ازامات الدىندا ءسوز سويلەدى. ميتينگ قۇران سۇرەلەرىن وقۋدان باستالىپ، ساياساتكەرلەردىڭ مالىمدەمەلەرىنە ۇلاستى.
ءوز سوزىندە تۇركيا باسشىسى الەمدىك قاۋىمداستىقتى تاياۋ شىعىس ايماعىندا بىرلەسكەن كۇش-جىگەر جۇمساۋعا شاقىردى. ايتپەسە ونىڭ ايتۋىنشا، بارلىعى بىرىنەن سوڭ ءبىرى پالەستينانىڭ تاعدىرىن قايتالايدى.
«يزرايلدىڭ بۇل ايماقتاعى «پەشكا» ەكەنىن ءبارى بىلەدى، ونى ۋاقىتى كەلگەندە قۇربان ەتۋگە بولادى. گازا سەكتورىنداعى قىرعىن - تولىعىمەن باتىستىڭ ءىسى»، - دەيدى ەردوعان.
وسى ۋاقىتقا دەيىن تۇركيانىڭ تۇكپىر-تۇكپىرىنەن ىستانبۇلعا پالەستينا جانە تۇركيا تۋىن ۇستاعان ادامدار كەلىپ جاتىر. بيلىكتىڭ ايتۋىنشا، ميتينگىگە 1,5 ميلليونعا جۋىق ادام قاتىسىپ جاتىر. قاتىسۋشىلار پلاكاتتار مەن باننەرلەردى ۇستاعان جانە كوپتەگەن ادامدار يزرايلگە قارسى ۇراندار ايتۋدا.
وسىعان بايلانىستى قالا بويىنشا قاۋىپسىزدىك شارالارى كۇشەيتىلدى. ىستانبۇل بيلىگى كولىك قوزعالىسىنىڭ جۇمىسىنا تۇزەتۋلەر ەنگىزدى، ال بۇرىنعى اۋەجايعا بەت العان مەگاپوليس تۇرعىندارى مەن قوناقتارى ءۇشىن قوعامدىق كولىك - تەگىن.
ميتينگىنىڭ اۋقىمى مەن وعان قاتىساتىن ادام سانىنا قاراعاندا، بۇل - پالەستينانى قولداۋ بويىنشا وتكەن الەمدەگى ەڭ اۋقىمدى اكتسيا.
ەسكە سالايىق، 7- قازاندا پالەستيناداعى حاماس توبى يزرايلگە شابۋىل جاساپ، ەلدەر سوعىس جاعدايىنا كوشكەن بولاتىن.
