تۇركيادا مەديتسينا جانە كوسمەتولوگيا ماقساتىندا شايان وسىرۋگە رۇقسات ەتىلدى
استانا. KAZINFORM - ەلدەگى 86 كومپانياعا شايانداردى ولاردىڭ ۋىن مەديتسينالىق جانە كوسمەتولوگيالىق ماقساتتا پايدالانۋ ءۇشىن ليسەنزيالار اياسىندا جاڭا مۇمكىندىكتەر بەرىلىپ، قاتاڭ شەكتەۋلەر قويىلدى، دەپ حابارلايدى Kazinform مەنشىكتى ءتىلشىسى.
جوبادا شايانداردىڭ Androctonus turkiyensis سياقتى تولتۇرىنە ەرەكشە نازار اۋدارىلىپ وتىر، ولاردىڭ ۋى قولدانۋ سپەكترى كەڭ ۋ قايتاراتىن ءدارى-دارمەكتەر ازىرلەۋ ءۇشىن باعالى بولىپ تانىلدى.
مامانداردىڭ ايتۋىنشا، بۇل ۋدان وندىرىلەتىن دارىلەر تەك ىشكى نارىقتا عانا ەمەس، ەكسپورت نارىعىندا دا سۇرانىسقا يە بولادى.
مامانداندىرىلعان شارۋاشىلىقتار ورنالاساتىن نەگىزگى ايماقتارعا شانلىۋرفا، كونيا، ەليازىگ جانە ت. ب. پروۆينتسيالار كىرىپ وتىر. جوبانى تۇركيانىڭ اۋىل شارۋاشىلىعى جانە ورمان شارۋاشىلىعى مينيسترلىگى قاداعالايدى، بۇل قاۋىپتى جاندىكتەردى ءوسىرۋ كەزىندە بارلىق ەكولوگيالىق جانە قۇقىقتىق نورمالاردىڭ ساقتالۋىن قامتاماسىز ەتەدى.
ۆەدومستۆودا اتاپ وتىلگەندەي، ەلدەگى مۇنداي جاڭاشىلدىقتار تابيعي قۇرامداس بولىكتەرگە نەگىزدەلگەن جوعارى ساپالى پرەپاراتتار ارقىلى بيوفارماتسيەۆتيكالىق سالانى دامىتادى.
الايدا تۇركيادا جابايى تابيعاتتا شايانداردى رۇقساتسىز اۋلاۋعا قاتاڭ تىيىم سالىنعان. بۇل تىيىمدى بۇزعانى ءۇشىن ايىپپۇل 557 مىڭ تۇرىك ليراسىنا (شامامەن 15 مىڭ دوللار) جەتۋى مۇمكىن.
وسىلايشا، جاڭا جوبا تۇركيانىڭ بيوفارماتسيەۆتيكالىق يندۋسترياسىن دامىتۋعا قوسىمشا مۇمكىندىكتەر اشىپ قانا قويماي، سيرەك كەزدەسەتىن جانە قاۋىپتى شايان تۇرلەرىن قورعاۋ، ولاردىڭ تابيعاتتا ساقتالۋىن قامتاماسىز ەتۋ بويىنشا بەلگىلى ءبىر شارالاردى قامتيدى.
وسىعان دەيىن تۇركيانىڭ اسكەري ءونىم ەكسپورتى بويىنشا جاڭا رەكورد ورناتقانىن جازدىق.
