تۇركيادا جەر سىلكىنىسى كەزىندە قۇلاعان ءۇيدى سالعان مەردىگەر 18 جىلعا سوتتالدى
استانا. KAZINFORM - تۇركيادا جەر سىلكىنىسى كەزىندە قۇلاعان ءۇيدى سالعان مەردىگەرى ءمۇسليم دەميرەر 18 جىل 1,5 ايعا باس بوستاندىعىنان ايىرىلدى. بۇل تۋرالى Anadolu اگەنتتىگى جازدى.
ءبىر جىل بۇرىن بولعان جويقىن جەر سىلكىنىسى كەزىندە ايماقتاعى ۇيلەردىڭ قيراۋىنا بايلانىستى سوت پروتسەسى ءالى جالعاسىپ جاتىر.
شانلىۋرفادا ءبىر ءۇي قۇلاپ، 34 ادام قازا تاپقان بولاتىن. عيماراتتىڭ قۇرىلىسىنا جاۋاپتىلاردىڭ ۇشەۋى جەر سىلكىنىسىنە دەيىن قايتىس بولعان.
باستاپقىدا سوت ءمۇسليم دەميرەردى 21 جىل 9 ايعا باس بوستاندىعىنان ايىردى. دەميرەردىڭ ۇلى دا جەر سىلكىنىسى كەزىندە ۇيلەردىڭ قۇلاۋىنان قازا تاپتى. سوت وسى ءمان-جايدى ەسكەرىپ، مەردىگەرگە بەرىلگەن مەرزىمدى قىسقارتتى. پروكۋرورلار مەن مارقۇمداردىڭ جاقىندارى سوتتان دەميرەرگە ەڭ اۋىر جازا تاعايىنداۋدى سۇراعان.
ەسكە سالا كەتەيىك، 2023-جىلى 6-اقپاندا تۇركيانىڭ وڭتۇستىك- شىعىسىندا ەپيتسەنترى كاحرامانماراشتا ماگنيتۋداسى 7-دەن اساتىن ەكى ءىرى جەر سىلكىنىسى بولدى. جەراستى دۇمپۋلەرى ەلدىڭ 10 پروۆينتسياسىندا، سونداي-اق كورشىلەس ەلدەردە، سونىڭ ىشىندە سيريادا دا سەزىلدى.
تۇركيادا جەر سىلكىنىسى كەزىندە قۇلاعان تۇرعىن ۇيلەرگە قاتىستى ءىس بويىنشا 269 ادام قاماۋعا الىندى. جەر سىلكىنىسىنەن كەلگەن ماتەريالدىق شىعىن ەكى تريلليون تۇرىك ليراسىن (105 ميلليارد دوللاردى) قۇرادى.
تۇركيانىڭ وڭتۇستىك-شىعىسىندا بولعان جويقىن جەر سىلكىنىسىنەن قازا تاپقاندار سانى 50 مىڭنان استى.
اۆتور
زارينا تۋعانبايەۆا
