تۇركيادا حالىقارالىق قىلمىستىق ۇيىم مۇشەلەرى ۇستالدى
تۇركيانىڭ قاۋىپسىزدىك كۇشتەرى حالىقارالىق قىلمىستىق ۇيىمداردىڭ ءۇش باسشىسىن ۇستادى. ولاردىڭ اراسىندا ينتەرپولىڭ «قىزىل بيۋللەتەنىمەن» ىزدەۋدە بولعاندار بار.
بۇل تۋرالى الەۋمەتتىك جەلىدە تۇركيا ءى ءى م باسشىسى ءالي يەرليكايا مالىمدەدى. Kazinform بۇل تۋرالى انادولى اقپارات اگەنتتىگىنە سىلتەمە جاساپ حابارلايدى.
«قاۋىپتى قىلمىسكەرلەر تۇركيا پوليتسياسى باس باسقارماسىنىڭ ەسىرتكى قىلمىسىنا قارسى كۇرەس باسقارماسىمەن كەلىسە وتىرىپ، الانيا (انتاليا) جانە ىستانبۇلدا ۇيىمداستىرىلعان Kafes-21 وپەراتسياسى اياسىندا ۇستالدى»، - دەدى مينيستر.
انتاليا پروۆينتسياسىنىڭ الانيا اۋدانىندا ۇستالعان توماس دجوزەف كونراد ينتەرپولدىڭ «قىزىل بيۋللەتەنى» بويىنشا ىزدەۋدە بولدى. ول پولشادا ەسىرتكى ساۋداسىمەن اينالىساتىن، ماروككودان يتاليا مەن يسپانياعا ۇلكەن كولەمدە ەسىرتكى جەتكىزىپ، سودان كەيىن ەۋروپانىڭ باسقا ەلدەرىنە از مولشەردە جونەلتىپ جۇرگەن ۇيىمداسقان قىلمىستىق توپتى باسقاردى.
«تۇركيانىڭ قاۋىپسىزدىك كۇشتەرى ينتەرپولدىڭ «قىزىل بيۋللەتەنىمەن» قىتايدا «الاياقتىق جانە زاڭسىز ارەكەتتەر» ءۇشىن ىزدەۋدە بولعان جينكين پەندى ىستانبۇلدىڭ فاتيح اۋدانىندا ۇستادى. دانيەل الەكساندر ميۋللەرگە گەرمانيادا ءبىر توننا كوكايننىڭ زاڭسىز اينالىمىنا قاتىسى بار دەگەن ايىپپەن شۇعىل ىزدەۋ جاريالاندى، ول ىستانبۇلدىڭ بەيوگلۋ اۋدانىندا ۇستالدى»، - دەپ اتاپ ءوتتى ءا. يەرليكايا.
ول تۇركيانىڭ قۇقىق قورعاۋ ورگاندارى حالىقارالىق قىلمىستىق ۇيىمداردىڭ، ەسىرتكى ساتۋشىلار مەن باندالاردىڭ ەل اۋماعىندا كەز كەلگەن ارەكەتىنە توسقاۋىل قويۋدى جالعاستىراتىنىن باسا ايتتى.
اۆتور
ەركەجان سماعۇلوۆا
